کوردپرێس: له‌و په‌یامه‌یدا له‌باره‌ی دۆخی خه‌ڵكی كورد له كه‌ركووک و ناوچه دابڕێنراوه‌كانی تر، قوباد تاڵەبانی رایده‌گه‌یێنێت: له دۆخێكی یه‌كجار خراپ و دژواردا ده‌ژین و هه‌ست به ئاسایش و ئارامی ناكه‌ن، رۆژانه هه‌راسان ده‌كرێن و به‌ره‌نگاری توندڕه‌وی و حوكمی چه‌ک ده‌بنه‌وه، كه‌چی هه‌موو شه‌ڕه‌كه له دانانی پارێزگارێک و كێشه‌ی كاندیدی ئه‌م پۆسته‌دا چڕكراوه‌ته‌وه.
ده‌قی په‌یامه‌كه:
كۆمه‌ڵانی خه‌ڵكی كوردستان...
هاتنی جه‌ژنی ڕه‌مه‌زان له هه‌موو لایێک پیرۆز بێت، جه‌ژن ده‌رفه‌تێكی زێڕینه بۆ لێبورده‌یی و به‌رقه‌راركردنی ئاشتی كۆمه‌ڵایه‌تی، به‌ڵام به‌داخه‌وه په‌یوه‌ندییه‌كانی یه‌كێتی و پارتی به ئاراسته‌یێک ده‌ڕۆن خه‌ریكه خۆشی و شادی جه‌ژن له گه‌له‌كه‌مان تێكبده‌ن و نه‌هێڵن وه‌ک جاران تامی بكات.
خه‌ڵكی ئێمه وه‌ڕه‌س بوون له ململانێ، بێزارن له شه‌ڕه قسه و پاڵه‌وانبازی، یه‌كێتی و پارتی و حیزبه كوردییه‌كانی تر شه‌ڕ و ئاشتی، ناكۆكی و كاری پێكه‌وه‌ییان وه‌ک یه‌ک ئه‌زموون كردووه، ئیتر دوای ئه‌م هه‌موو ساڵه ده‌بێت له‌وه تێگه‌یشتبێتین كه هێز له پێكهاتندایه نه‌ک له‌شه‌ڕه لێدوان و قووڵ كردنی زیاتری ناكۆكییه‌كان.
خه‌ڵكی كورد له كه‌ركووک و ناوچه دابڕێنراوه‌كانی تر له دۆخێكی یه‌كجار خراپ و دژواردا ده‌ژین و هه‌ست به ئاسایش و ئارامی ناكه‌ن، رۆژانه هه‌راسان ده‌كرێن و به‌ره‌نگاری توندڕه‌وی و حوكمی چه‌ک ده‌بنه‌وه، كه‌چی هه‌موو شه‌ڕه‌كه له دانانی پارێزگارێک و كێشه‌ی كاندیدی ئه‌م پۆسته‌دا چڕ كراوه‌ته‌وه كه به‌شێكی بچووكه له كێشه كه‌ڵه‌كه‌بووه‌كانی ئه‌و ناوچانه به درێژایی ته‌مه‌نی ده‌وڵه‌تی عێراق.
له سۆنگه‌ی هه‌ست كردنم به مه‌ترسییه‌كانی ئه‌م دۆخه و وه‌ک به‌جێ هێنانی ئه‌ركی خۆم داوا له سه‌ركردایه‌تی یه‌كێتی و پارتی ده‌كه‌م ئه‌م جه‌ژنه كه بۆنه‌یێكی گه‌وره‌ی لێبورده‌یی و گه‌ردن ئازادییه وه‌ک ده‌رفه‌تێكی تری خێرا و نوێ بڕه‌خسێنن بۆ پێكهاتن و تێپه‌ڕاندنی تارمایی لێكترازان.
کۆدی هەاڵنێر: 60113
Your Comment