به‌پێی هه‌واڵی کوردپرێس، ڕۆژی هه‌ینی 29ی ئاداری 2019 محه‌مه‌د حه‌لبووسی سه‌رۆکی په‌رله‌مانی عێراق له لێدوانێکدا له ئه‌نیستیتۆی ئاشتیی ئه‌مریکا (USIP) له ماوه‌ی سه‌ردانه‌که‌یدا بۆ واشنتۆن ڕای‌گه‌یاند: ستایشی هه‌وڵی هاوپه‌یمانی نێوده‌وڵه‌تی ده‌که‌ین بۆ شکستهێنانی داعش به‌م حاڵه‌شه‌وه شکستهێنانی سه‌ربازیی ئه‌و گرووپه تیرۆریستییه به مانای ڕیشه‌کێش کردنی تیرۆریزم نییه و ده‌بێ هاوکارییه‌کان له‌پێناو له‌ناوبردنی ئه‌و ئایدیۆلۆژیا په‌ره پێبده‌ین.
سه‌رۆکی په‌رله‌مانی عێراق زیادی کرد: ڕێککه‌وتن له نێوان ده‌سه‌ڵاتی جێبه‌جێکار و یاسادانانی عێراق هه‌یه و بۆ له‌ناوبردنی داعش عادل عه‌بدولمه‌هدی سه‌رۆک وه‌زیران و به‌رهه‌م ساڵح سه‌رۆک کۆماری عێراقیش باوه‌ڕیان به هاوکاری له‌گه‌ڵ هاوپه‌یمانیی نێوده‌وڵه‌تی هه‌یه.
حه‌لبووسی ته‌ئکیدی له‌سه‌ر گرنگیی ڕاهێنانی سه‌ربازیی هێزی ئه‌منیی عێراق و هاوکاری له‌گه‌ڵ وڵاته‌که‌ی له بواری ئه‌منی و ئابووریدا کرده‌وه و ڕاشی‌گه‌یاند: هه‌وڵه‌کانی قۆناغی داهاتوو له‌جیاتی هاوکاریی سه‌ربازی له بواری هه‌واڵگریدا ده‌بێت و ده‌بێ له ڕووی هه‌واڵگری و دارایییه‌وه پشتیوانی له هێزه‌کانی عێراق بکرێت.
سه‌رۆکی په‌رله‌مانی عێراق ئاماژه‌ی به‌وه‌ش کرد که پێده‌چێت ژماره‌یێک له وڵاتان پشتیوانی له گرووپه تیرۆریستییه‌کان بکه‌ن و به‌و بۆنه‌شه‌وه ده‌بێ هه‌ڵوێستێکی ڕوون له‌مباره‌وه بگیردرێته‌به‌ر و له‌باره‌ی سووریاشه‌وه گوتی: سووریا وڵاتێکی براده‌ری عه‌ره‌بییه و ئه‌و شته‌ی که له عێراق و سووریا ڕوویان دا جیاوازییێکی زۆری به‌یه‌که‌وه نییه.
ناوبراو جه‌ختی له‌سه‌ر گرنگیی گه‌ڕانه‌وه‌ی سووریا بۆ کۆمکاری عه‌ره‌ب و ده‌وربینینی دووباره‌ی ئه‌وان کرده‌وه و گوتیشی: له ئه‌نبار هێرشی تیرۆریستیم کرایه سه‌ر و چوومه سووریا هه‌ر بۆیه ده‌زانم که خه‌ڵکی سووریا چۆن میوانداری له خه‌ڵکی عێراق ده‌که‌ن.
سه‌رۆکی په‌رله‌مانی عێراق پته‌وکردنی په‌یوه‌ندیی وڵاته‌که‌ی له‌گه‌ڵ سووریای دووپات کرده‌وه و زیادیشی کرد: سه‌قامگیریی سووریا له به‌رژه‌وه‌ندیی عێراقدایه و پشتیوانی له هه‌وڵه نێوده‌وڵه‌تییه‌کان ده‌که‌ین بۆ چاره‌کردنی قه‌یرانی ئه‌و وڵاته. بانگهێشتی سه‌رۆکی په‌رله‌مانی سووریام کردوووه که مانگی داهاتوو سه‌ردانی عێراق بکات و گفتوگۆی نێوان لیژنه‌کانی هه‌ردوولا له‌وباره‌وه درێژه‌ی هه‌یه.
حه‌لبووسی هاوپه‌یوه‌ند به پێبه‌ندیی عێراق به سزاکانی ئه‌مریکا بۆ سه‌ر ئێران ڕوونی کرده‌وه: دۆخی عێراق له ته‌عامول له‌گه‌ڵ ئێران زۆر جیاوازه، شوێنێک که سنوورێکی هاوبه‌شی زۆرمان له‌گه‌ڵ یه‌کتر هه‌یه و نامانه‌وێت له‌گه‌ڵ ئه‌و وڵاته هاوشێوه‌ی دیکه‌ی وڵاتانی دراوسێ ناکۆکیمان هه‌بێت.
سه‌رۆکی په‌رله‌مانی عێراق زیادیشی کرد: سه‌ره‌ڕای ئه‌وه‌ی که عێراق وڵاتێکی هه‌نارده‌کراوی نه‌وته به‌ڵام نه‌مانتوانی له ڕووی ئابوورییه‌وه پشت به خۆمان ببه‌ستین و به‌و بۆنه‌شه‌وه ده‌بێ ئه‌مریکا کارێک بکات که له‌مباره‌وه به‌ره‌وڕووی هیچ جۆره کێشه‌یێک نه‌بینه‌وه.
حه‌لبووسی له کۆتاییدا ته‌ئکیدی له‌سه‌ر ئه‌وه کرده‌وه که عێراق دژی سیاسه‌تی سه‌پاندنی گه‌مارۆ بۆ سه‌ر وڵاتانه و ده‌یانه‌وێت سه‌روه‌ریی عێراق بپارێزرێت و گوتیشی: سه‌پاندنی گه‌مارۆ بۆ سه‌ر ئێران کارتێکه‌ریییێکی نێگه‌تیڤی له‌سه‌ر ئاڵوگۆڕی بازرگانی ده‌بێت و ڕێگری له‌و بابه‌ته ده‌کات.
سه‌رچاوه: هه‌واڵده‌ریی ئه‌خبارییه
کۆدی هه‌واڵنێر: 60103
Your Comment