بەپێی هەواڵی کوردپرێس برایان هۆک نوێنەری تایبەتی ئەمریکا بۆ کاروباری ئێران لە لێدوانێکدا وتبووی کە لێخۆشبوونەکانی ئەمریکا بۆ کڕینی نەوتی ئێران کە پێشتر 8 وڵاتی گرتبوویەوە لە کاتی دیاریکراودا کۆتاییی پێدەێت و ماوەکەش بۆ هیچ وڵاتێک درێژ ناکرێتەوە و ئەوەش لە کاتێکدایە مانگی نیسان لێبوردنەکە کۆتاییی پێدێت.
بەهرام قاسمی وتەبێژی وەزارەتی دەرەوەی ئێران لە لێدوانێکدا کاردانەوەی بەرانبەر بە وتەکانی برایان هۆک نوێنەری تایبەتی ئەمریکا بۆ کاروباری ئێران پیشان داوە و وتوویەتی برایان هۆک نەخۆشیی دەروونیی "ئازاردانی ئێران"ی هەیە و دیسان وتەکانی ناوبراو کینەی ئەو بەرپرسە ئەمریکییە بەرانبەر بە ئێرانییەکان دووپات دەکاتەوە و دەیسەلمێنێت کە هۆک دەرک بە ڕاستییەکانی عالەم و پێگەی لاوازبووی ئەمریکا لە کۆمەڵگەی دەولی ناکات.
وتەبێژی وەزارەتی دەرەوەی ئێران زیادیشی کرد: با ئەمریکا باش بزانێت کە ئەو کاتە بەسەر چوو کە ئەمریکا هەرچی ئارەزووی بوو بیکات. با ئەم بەرپرسە ئەمریکییە سەرنجێکی ئەو ڕووداوانە بدات کە لە جیهاندا ڕوو دەدەن و تێبگات کە سیاسەتی عالەمی بەرەو چ ئاقارێک دەچێت دیارە ئەوەی ڕوو دەدات هەرگیز بە حەزی ئەمریکا و دانیشتووانی کۆشکی سپی نیە.
کۆدی هەواڵنێر: 60101
Your Comment