به‌پێی هه‌واڵی کوردپرێس، ئێواره‌ی ڕۆژی چوارشه‌ممه‌ 27ی ئاداری 2019 دیار به‌رواری نوێنه‌ری پارتی له‌ په‌رله‌مانی عێراق به‌ شه‌فه‌ق نیووزی ڕاگه‌یاند: ڕاپۆرته‌کان له‌باره‌ی هه‌وڵی پارتی بۆ وه‌رگرتنی پۆستی پارێزگاری نه‌ینه‌وا له‌ باکووری ڕۆژئاوای ئه‌و وڵاته ڕه‌ت ده‌که‌ینه‌وه‌ و ئه‌و هه‌واڵانه‌‌ دوورن له‌ ڕاستییه‌وه‌.

ناوبراو ته‌ئکیدی له‌سه‌ر ئه‌وه‌ کرده‌وه‌ که‌ پارتی خواستێکی بۆ وه‌رگرتنی پۆستی پارێزگاری نه‌ینه‌وا نییه‌ و گوتیشی: ڕێککه‌وتنه‌کان له‌سه‌ر پۆستی پارێزگاری نه‌ینه‌وا گۆڕانێکی به‌ سه‌ردا نه‌هاتوووه‌ چوونکه به‌پێی ڕێککه‌وتنه‌که‌‌ پۆستی پارێزگار ئیستیحقاقی عه‌ره‌به‌ و یه‌کێک له‌ جێگرانی پارێزگاریش کورد ده‌بێت.

ئه‌مه‌ش له‌ حاڵێکدایه‌ 21ی ئه‌م مانگه له‌ ناوچه‌ى گه‌شتیاریی مووسڵدا له‌سه‌ر ڕووبارى دیجله‌ قه‌یاغێک به‌ زیاتر له‌ 200 که‌سه‌وه‌ ژێر ئاو که‌وت و به‌هۆیه‌وه‌ زیاتر له‌ 120 که‌س گیانى له‌ده‌ست داوه‌ و ده‌یانى دیکه‌ش تا ئێستا ته‌رمه‌کانیان نه‌دۆزراونه‌ته‌وه‌ و دوای ڕووداوه‌که‌ی مووسڵ، په‌رله‌مانی عێراق له‌سه‌ر داوای عادل عه‌بدولمه‌هدی سه‌رۆک وه‌زیرانی ئه‌و وڵاته‌ کۆ بوویه‌وه‌ و له‌سه‌ر کارلابردنی نه‌وفل عاگوب پارێزگاری نه‌ینه‌وا و دوو جێگره‌که‌ی خرایه‌ ده‌نگدانه‌وه‌ و به‌ زۆرینه‌ی ده‌نگ له‌ کاره‌کانیان دوور خرانه‌وه‌.

کۆدی هه‌واڵنێر: 60103