دیار ئامۆ هه‌واڵنێری مه‌یدانیی جێگیربووی شارۆچکه‌ی باغۆزی سه‌ر به پارێزگاری دێره‌زووری سووریا سه‌باره‌ت به دوایین گۆڕانکارییه‌کانی ناوچه‌که به ئاژانسی کوردپرێسی ڕاگه‌یاندوووه: تاکه‌ڕێگای مانه‌وه‌ی داعش به‌کارهێنانی چه‌کدارانی خۆکوژه به مه‌به‌ستی ڕێگری له پێشڕه‌وتی هێزی سووریای دیموکرات.
ناوبراو گوتیشی: ئێستاکه شه‌ڕ ڕاوه‌ستاوه و به‌ره‌وپێشچوونێک ئه‌نجام نادرێت و ئه‌وه‌ش بۆ دۆخی خراپ و ناجێگیری خه‌ڵکی سڤیل له باغۆز ده‌گه‌ڕێته‌وه.
ئه‌و هه‌واڵنێره مه‌یدانییه جه‌ختی کرده‌وه: ڕۆژی هه‌ینی 15ی ئاداری 2019 سێ چه‌کداری خۆکوژی داعش خۆیانیان ته‌قانده‌وه که ئه‌و بابه‌ته کوژرانی ژماره‌یێک ژن و منداڵی باغۆزی لێکه‌وته‌وه.
دیار ئامۆ ڕاشی‌گه‌یاند: داعش ده‌یه‌وێت به به‌کارهێنانی چه‌کدارانی خۆکوژ ڕێگری له پێشڕه‌ویی هه‌سه‌ده بکات و له ڕاستیدا قه‌ڵغانی مرۆیی به‌کار ده‌هێنێت بۆ ئه‌وه‌ی ئۆپه‌راسیۆنه‌کان بوه‌ستێنێت.
هه‌واڵنێری مه‌یدانیی جێگیربووی باغۆز ئاماژه به خۆبه‌ده‌سته‌وه‌دانی چه‌کدارانی داعش به هێزی کورد- عه‌ره‌ب ده‌کات و ده‌شڵێت: دوێنێ 1300 چه‌کداری داعش و خێزانه‌کانیان خۆیانیان ته‌سلیمی هه‌سه‌ده کرد و ئه‌و شته‌ی مایه‌ی سه‌رسوڕمانه نیشته‌جێ‌بوونی ئه‌و حه‌شیمه‌ته له ناوچه‌یێکی بچووک وه‌ک باغۆزه.
دیار ئامۆ زیادیشی کرد: گوایه داعش ده‌یزانی باغۆز دواناوچه‌یێکه که کۆنتڕۆڵی ده‌کاته‌وه به‌و بۆنه‌وه تێکڕای چه‌کدارانی له‌و ناوچه‌یه کۆ کردۆته‌وه.
کۆدی هه‌واڵنێر: 60103
Your Comment