به‌پێی هه‌واڵی کوردپرێس، ئه‌مرۆ چوارشه‌ممه 13ی 3ی 2019 مه‌سروور بارزانی ڕاوێژکاری ئه‌نجومه‌نی ئاسایشی هه‌رێمی کوردستان پێشوازیی له شاندێکی باڵای سه‌ربازیی هاوپه‌یمانان بۆ بواری چاکسازی و مه‌شق و ڕاھێنانی ھێزی پێشمه‌رگه کرد و به‌رده‌وامیی پاڵپشتیی زیاتری هاوپه‌یمانان بۆ هێزی پێشمه‌رگه به گرنگ وه‌سف کرد.
له دیداره‌كه‌دا وێڕای هه‌ڵسه‌نگاندن بۆ دوامیکانیزم و به‌ڕێوه‌چوونی پرۆسه‌ی چاکسازی و ڕێکخستنه‌وه‌ی وه‌زاره‌تی پێشمه‌رگه، ئه‌گه‌ری سه‌رهه‌ڵدانه‌وه‌ی داعش و په‌ره‌سه‌ندنی جموجۆڵه‌کانیان تاوتوێ کرا و له‌وباره‌وه مه‌سروور بارزانی سوپاسی هه‌وڵه‌کانی هاوپه‌یمانی کرد و هیوای به‌رده‌وامیی هاوكارییه‌کانی خواست به‌تایبه‌تی له بواری چاكسازی و ڕێكخستنه‌وه‌ی وه‌زاره‌تی پێشمه‌رگه‌دا.
هه‌روه‌ها مه‌سروور بارزانی بۆ ڕێگه‌گرتن له مه‌ترسی و هه‌ڕه‌شه‌کانی تیرۆریستان، هاوکاریی هه‌مه‌لایه‌نه و ڕه‌خساندنی زه‌مینه‌ی له‌باری بۆ ئاسایی کردنه‌وه و چاره‌سه‌ریی کێشه سیاسی و ئیداری و ده‌ستوورییه‌کانی به پێویست زانی.
لای خۆیه‌وه شاندی میوان وێڕای جه‌ختكردنه‌وه له هاوکاریی زیاتری هێزی پێشمه‌رگه بۆ به‌ره‌وپێشبردنی پرۆسه‌ی چاکسازی و ڕێکخستنه‌وه‌ی وه‌زاره‌تی پێشمه‌رگه، پشتگیریی خۆیان بۆ هه‌ماهه‌نگیی نێوان هێزی پێشمه‌رگه و هێزی هاوپه‌یمانان و هێزه عێراقییه‌کان له گشت ناوچه‌کان ڕاگه‌یاند.
کۆدی هه‌واڵنێر: 60103
Your Comment