کوردپرێس:
بڕیاره به‌تازه‌ترین سیسته‌م و ته‌کنیکی سینه‌مایی، یه‌که‌مین فیلمی کوردی درێژی ئه‌نیمه‌یشنی جه‌نگی کوردی له‌سه‌ر قاره‌مانییه‌تی پێشمه‌رگه له ڕووبه‌ڕووبوونه‌وه‌ی چه‌کدارانی داعش به ناوی "تێکشکێنه‌ری ئه‌فسانه" به‌رھه‌م دێت.
چیرۆک و سیناریۆی ئه‌م فیلمه له‌لایه‌ن پشتیوان عه‌بدوڵڵا نووسراوه و له‌مباره‌یه‌وه به ڕووداوی ڕاگه‌یاند: "داستانی فیلمه‌که له کاتی داگیر کردنی مووسڵ له‌لایه‌ن داعش ده‌ست پێده‌کات، دواتر ھه‌وڵی داعش بۆ ھێرشکردنه سه‌ر ھه‌رێمی کوردستان و ھه‌ولێری پایته‌خت نیشان ده‌دات که ده‌یانه‌وێت ئاڵای داعش له‌سه‌ر قه‌ڵای ھه‌ولێر له شوێنی ئاڵای کوردستان به‌رز بکه‌نه‌وه به‌ڵام ھێرشی داعش بۆ سه‌ر کوردستان و ھه‌ولێر به خۆڕاگری و قاره‌مانییه‌تی و به‌ره‌نگاربوونه‌وه‌ی سه‌خت پووچه‌ڵ ده‌کرێته‌وه و داعش ده‌شکێ".
پشتیوان گوتیشی: "فیلمه‌که شه‌ڕ و جه‌نگ و قاره‌مانییه‌تی زۆری پێشمه‌رگه‌ی تێدایه و به ئازادکردنی شه‌نگال و ھێنانه‌خواره‌وه‌ی ئاڵای داعش و به‌رزکردنه‌وه‌ی ئاڵای کوردستان له به‌رزاییی چیای شه‌نگال کۆتایی دێت".
نووسه‌ری فیلمه‌که له‌باره‌ی ئاماده‌کارییه‌کانه‌وه ڕاشی‌گه‌یاند: "ئاماده‌کاریی سه‌ره‌تاییی ته‌واو بۆ فیلمه‌که کراوه که چه‌ند کۆمپانیایێکی گرنگیی سینه‌مایی کاری تێدا ده‌که‌ن و درێژی فیلمه‌که یه‌ک کاژێره و له ماوه‌ی ٩ مانگ ته‌واو ده‌بێت و دواتر له سینه‌ماکانی کوردستان و عێراق نیشان ده‌درێت که به پێشکه‌وتووترین سیسته‌می ته‌کنیکی "سێڤن دی" دروست ده‌کرێ، له‌گه‌ڵ ئه‌وه‌شدا ستافێکی پرۆفیشناڵ له نیگارکێش و دیزاینه‌ر و ئارت دیزاینه‌ر کاری تێدا ده‌که‌ن".
کۆدی هه‌واڵنێر: 60103
Your Comment