کوردپرێس:
بەپێی ڕاگەیەندراوێكی نووسینگەی ڕۆژنامەوانیی سەرۆكی پەڕلەمانی عێراق، محەمەد حەلبوسی، سەرۆكی پەڕلەمان و شاندی یاوەری کە سەردانی تارنی پێتەختی ئێرانیان کردووە لەگەڵ محەمەد حەواد زەریف، وەزیری دەرەوەی ئەو وڵاتە کۆبوونەتەوە و لە دیدارەکەیاندا گفتوگۆیان كردووە لەسەر دواین دۆخی ناوچەكە و پتەوكردنی پەیوەندییەكانی نێوان هەردوو وڵات.
حەلبوسی ڕایگەیاندووە، پێویستە هەماهەنگیی نێوان عێراق و ئێران لەگەڵ وڵاتانی دەوروبەر بەردەوام بێت بۆ دروست كردنی سەقامگیری لە ناوچەكە.
سەرۆکی پەرلەمانی عێراق لە دیدارەکەی لەگەڵ زەریفدا وتیشی، “پاڵپشتیی ئێران بۆ عێراق لە شەڕی دژی تیرۆر و هاوكاری كردنی جێگەی پێزانینە”.
حەلبوسی جەختیشی كردەوە، هاوپەیمانیی نێودەوڵەتی هیچ مەترسییێک لەسەر وڵاتانی دراوسێ لەنێویشیاندا ئێران دروست ناكات و بەهیچ شێوەیێک ڕێگە نادەین خاكی عێراق بۆ ئازاردانی وڵاتانی دراوسێ بەكاربهێنرێت، چوونكە بوونی ئەو هێزانە بۆ هاوكاریكردنی عێراقە لە شەڕی دژی تیرۆر و مانەوەشیان بە ڕەزامەندیی عێراق بووە.
لای خۆشیەوە، محەمەد جەواد زەریف، وەزیری دەرەوەی ئێران سوپاسی عێراقی كردووە بۆ هەڵوێستەكانی بەرامبەر ئەو سزایانەی ئەمریكا بەسەر وڵاتەكەیدا سەپاندوویەتی و وتوویەتی، “ئێران نایەوێت عێراق ببێتە گۆڕەپانی ململانێی نێوان ئێران و وڵاتانی دیكە”.
وەزیری دەرەوەی ئێران ڕاشیگەیاندووە، ڕۆڵی عێراق گرنگە بۆ نزیك كردنەوەی نێوان وڵاتانی ناوچەكە.
محەمەد حەلبووسی سەرۆکی پەرلەمانی عێراق ڕۆژی چوارشەمە 6ی ئازاری 2019 بە سەردانێکی فەرمی گەیشتە تارانی پێتەختی ئێران و لەگەڵ سەرۆکی پەرلەمان و وەزیری دەرەوە و سکرتێری ئەنجومەنی نیشتمانی و سەرۆککۆماری ئەو وڵاتە دیدار و گفتوگۆی کرد.
Your Comment