شیار ئازاد هه‌واڵنێری مه‌یدانیی ئاماده‌بوو له شارۆچکه‌ی باغۆزی ناوچه‌ی دێره‌زووری سووریا له دیمانه له‌گه‌ڵ کوردپرێسدا ئاماژه به پڕۆسه‌ی هێواشی ڕزگارکردنی خه‌ڵکی سڤیل له ناوچه‌یێکی بچووکی ژێر کۆنتڕۆڵی داعش ده‌کات و ڕای‌ده‌گه‌یێنێت: ده‌ست پێکردنی ئۆپه‌راسیۆنی هێزی سووریای دیموکرات به‌ستراوه به ڕزگارکردنی خه‌ڵکی سڤیل له بنده‌ستی داعش.
ناوبراو گوتیشی: خێزانی داعشییه‌کان و خه‌ڵکی سڤیل خۆیان ته‌سلیمی هێزی کورد- عه‌ره‌بی سووریا ده‌که‌ن و وێده‌چێت ژماره‌یێک له چه‌کدارانی داعش له ناویاندا ببێت.
ئه‌و هه‌واڵنێره کورده‌ی دێره‌زوور ئاماژه به ڕووداوه‌کانی ئه‌مدواییه و بڕیاری ئه‌مریکا بۆ مانه‌وه له سووریا ده‌دات و ده‌شڵێت: بڕیاره 200 هێزی سه‌ربازیی ئه‌مریکا له باکوور و ڕۆژهه‌ڵاتی سووریا بمێننه‌وه و ئه‌وه‌ش له حاڵێکدایه که ناوچه‌یێکی گه‌وره له ده‌ستی هێزی کورد- عه‌ره‌بدایه و ئه‌و ژماره هێزه بۆ ئه‌و ناوچه‌یه به‌س نییه.
شیار ئازاد ڕاشی‌گه‌یاند: له‌لایێکی دیکه‌وه بڕیاره 200 هێزی سه‌ربازیی ئه‌مریکا له بنکه‌ی ته‌نف بمێنێته‌وه که ناوچه‌یێکی زۆر بچووکه که به بۆنه‌ی هۆکارێکی گرینگه ئه‌وه‌ش ڕێگری له نفووزی ئێران بۆ ناو سووریا و دروست‌کردنی ڕێڕه‌وێک بۆ گه‌یشتن به ئیسرائیل و لوبنانه.
ئه‌و هه‌واڵنێره مه‌یدانییه زیادی کرد: باکووری سووریا بۆ ئه‌مریکا گرینگه چوونکه گه‌وره‌ترین کانگای نه‌وت و گازی سووریا له ڕۆژهه‌ڵاتی فوراتدان و ئه‌و بابه‌ته‌ش ئه‌مریکا ناچار به مانه‌وه له سووریا ده‌کات.
کۆدی هه‌واڵنێر: 60103
Your Comment