به‌پێی هه‌واڵی کوردپرێس، ڕۆژی دووشه‌ممه 25ی شوباتی 2019 د. به‌رهه‌م ساڵح له كۆشكی ئه‌لیزێ له‌گه‌ڵ ئیمانۆیل ماكرۆن سه‌رۆكی فه‌ره‌نسا كۆ بوویه‌وه و سه‌باره‌ت به دۆخی سیاسی و په‌ره‌پێدانی په‌یوه‌ندییه دیپلۆماسییه‌کان و هه‌لومه‌رجی ئه‌منیی ڕۆژهه‌ڵاتی ناوه‌ڕاست و جیهان گفتوگۆیان كرد.
له کۆبوونه‌وه‌که‌دا سه‌رۆک کۆمارانی عێراق و فه‌ڕه‌نسا باسیان له گرنگیی په‌یوه‌ندییه دووقۆڵییه‌كان و چۆنیه‌تیی به‌ره‌وپێشبردنی په‌یوه‌ندییه‌كانی عێراق و فه‌ره‌نسا له گشت بواره‌كاندا كرد که زامنی به‌رژه‌وه‌ندیی هاوبه‌شی هه‌ردوولا بکات و یارمه‌تیده‌ری عێراقیش بێت بۆ تێپه‌ڕاندنی قه‌یرانه‌کان و ده‌ست پێکردنی پرۆسه‌ی ئاوه‌دانکردنه‌وه.
له‌و سه‌ردانه فه‌رمیه‌دا به‌رهه‌م ساڵح ئاماژه‌ی به‌وه كرد كه فه‌ڕه‌نسا هاوبه‌شێكی ستراتێژی و دۆستێكی گرنگیی عێراقه و ڕۆڵی به‌هێزی هه‌یه له پشتیوانی كردنی عێراق له پرۆسه‌ی بنبڕكردنی تیرۆر و هێنانهكایهی سه‌قامگیری و ئارامی له رۆژهه‌ڵاتی ناوه‌ڕاستدا، هه‌روه‌ها تیشكی خسته سه‌ر په‌یوه‌ندیی مێژووییی نێوان عێراق و فه‌ڕه‌نسا.
هه‌ر له کۆبوونه‌وه‌که‌دا به‌رهه‌م ساڵح خواستی عێراقی بۆ به‌‌شداریی فه‌ڕه‌نسا له ئاوه‌دانكردنه‌وه‌ی عێراق و بووژانه‌وه‌ی ژێرخانه‌که‌ی ده‌ربڕی و له‌م ڕوووه‌شه‌وه جه‌ختی له ناوچه ئازادكراوه‌كانی ژێر ده‌سه‌ڵاتی داعش کرده‌وه، هاوكات داوای كرد فه‌ڕه‌نسا هاوكاریی عێراق بكات له وه‌به‌رهێنان له كه‌رته‌كانی پیشه‌سازی و نه‌وت و وزه‌دا، به‌تایبه‌ت باسی له پێویستی گه‌شه‌پێدانی توانا سه‌ربازی و ئه‌منییه‌كانی عێراق له‌لایه‌ن فه‌ڕه‌نساوه کرد و له‌م چوارچێوه‌یه‌شدا ڕۆڵی به‌رچاوی فه‌ره‌نسای له هاوپه‌یمانیی نێوده‌وڵه‌تیی دژی تیرۆر و پشتیوانی كردنی عێراق له به‌ره‌نگاربوونه‌وه‌ی داعشدا به گرنگ وه‌سف کرد.
لای خۆیشیه‌وه ئیمانۆیل ماكرۆن وێڕای ده‌ربڕینی خۆشحاڵیی خۆی به سه‌ردانه‌که‌ی به‌رهه‌م ساڵح ته‌ئکیدی له پێویستی به‌هێزکردنی په‌‌یوه‌ندییه‌کانی عێراق و فه‌ڕه‌نسا کرده‌وه، هاوکات ئاماده‌ییی وڵاته‌كه‌شی نیشان دا بۆ پێشكه‌ش كردنی هاوكاری له كه‌رتی وزه و پیشه‌سازی و نه‌وتدا و گوتیشی: بۆ سه‌قامگیری و ده‌سته‌به‌رکردنی ئاسایش و ئارامی ئاماده‌ی هه‌ماهه‌نگی و کاری هاوبه‌شن له‌گه‌ڵ عێراقدا.
شایانی باسه؛ سه‌رۆک کۆماری عێراق پاش کۆبوونه‌وه‌ی له‌گه‌ڵ سه‌رۆکی فه‌ڕه‌نسا له کۆنگره‌یێکی ڕۆژنامه‌نووسیدا جه‌ختی له‌سه‌ر ئه‌وه کرده‌وه که 13 چه‌کداری داعشی به‌ڕه‌گه‌ز فه‌ڕه‌نسی ده‌ستگیر کراون و له ناوخۆی عێراقدا و به‌پێی یاساکانی وڵاته‌که‌یان دادگایی ده‌کرێن و ئه‌و چه‌کدارانه تۆمه‌تبارن به سه‌رپه‌رشتی کردنی ئۆپه‌راسیۆنی هێرش کردنه سه‌ر دامه‌زراوه‌کانی عێراق و کوشتنی هاووڵاتییانی عێراق.
له کۆنفڕانسه ڕۆژنامه‌نووسییه‌که‌دا سه‌رۆکی فه‌ڕه‌نساش ڕای‌گه‌یاند: به ڕه‌چاوکردنی سه‌روه‌ریی وڵاته‌کانیان، به‌رپرسانی عێراق و سووریا سه‌رپشکن له دادگایی کردنی چه‌کداره داعشییه به‌ڕه‌گه‌ز فه‌ڕه‌نسییه‌کان له وڵاته‌کانی خۆیان یان ناردنه‌وه‌یان به‌ڵام پێویسته زیندانیکراوه‌کان خزمه‌تگوزارییه دیپلۆماسییه‌کانیان بۆ ده‌سته‌به‌ر بکرێت.
کۆدی هه‌واڵنێر: 60103
Your Comment