به‌پێی هه‌واڵی کوردپرێس، حه‌سه‌ن جیهاد وته‌بێژى سه‌رۆكایه‌تیی كۆمارى عێراق به خه‌ندانى ڕاگه‌یاند: "ئه‌مڕۆ شه‌ممه 23ی شوباتی 2019 به‌رهه‌م ساڵح بۆ به‌شداری كردن له لووتكه‌ى ئابوورى عه‌ره‌بى- ئه‌ورووپى ده‌گاته شارى شرم شێخ له میسر و به‌شداری له لووتكه‌ی ئابوورى عه‌ره‌بی- ئه‌ورووپی ده‌کات".
ناوبراو ئاماژه‌ی به‌وه‌ش کرد: "له چوارچێوه‌ى لووتكه‌ی ئابوورى عه‌ره‌بی- ئه‌ورووپیدا باس له گرفت و ته‌نگه‌ژه ئابوورییه‌كان و چونێتیی گه‌شه‌پێدانى په‌یوه‌ندییه‌كانى عێراق و وڵاتانى ناوچه‌كه و ئه‌ورووپا ده‌كرێت و پێده‌چێت چه‌ند ڕێككه‌وتنێكیش له چواچێوه‌ى لووتكه‌كه‌دا واژۆ بكرێن."
وته‌بێژى سه‌رۆكایه‌تیی كۆمارى عێراق ڕاشی‌گه‌یاند: "به‌رهه‌م ساڵح له 26ى شوبات و پاش سه‌ردانه‌كه‌ى بۆ میسر له‌سه‌ر بانگهێشتى ئیمانۆیل ماكرۆن سه‌رۆكى فه‌ڕه‌نسا سه‌ردانى فه‌ڕه‌نسا ده‌كات و له كۆشكى ئیلیزێ پێشوازى فه‌رمى لێده‌كرێت".
ناوبراو ڕوونیشی کرده‌وه که له‌و سه‌ردانه‌یدا به‌رهه‌م ساڵح هه‌وڵى باشتركردن و به‌ره‌وپێشچوونى په‌یوه‌ندییه‌كانى به‌غدا و پاریس ده‌دات، هاوکات له‌گه‌ڵ سه‌رۆکی ئه‌و وڵاته‌دا باس له دۆخى سیاسى و شه‌ڕى دژ به داعش ده‌که‌ن.
کۆدی هه‌واڵنێر: 60103
Your Comment