به‌پێی هه‌واڵی کوردپرێس، ئێواره‌ی ڕۆژی چوارشه‌ممه 20ی شوباتی 2019 له سه‌لاحه‌ددین مه‌سعوود بارزانی پێشوازی کرد له جێمز جێفرى نوێنه‌ری نوێى سه‌رۆكی ئه‌مه‌ریكا بۆ هاوپه‌یمانێتیی نێوده‌وڵه‌تیی شه‌ڕی دژی داعش و جۆڵ ڕایبێرن جێگری یاریده‌ده‌ری وه‌زیری ده‌ره‌وه‌ی ئه‌مه‌ریكا بۆ كاروباری ڕۆژهه‌ڵاتی ناوه‌ڕاست و كونسووڵی گشتیی ئه‌مه‌ریكا له هه‌ولێر به وه‌كاله‌ت و ئه‌ندامانی تیمی ئه‌مه‌ریكی تایبه‌ت به سووریا.
له کۆبوونه‌وه‌که‌دا گفتوگۆ له‌سه‌ر بارودۆخی سیاسیی ناوچه‌كه و عێراق و هه‌رێمی كوردستان كراوه و نوێنه‌ری نوێى سه‌رۆكی ئه‌مه‌ریكا بۆ هاوپه‌یمانێتیی نێوده‌وڵه‌تیی شه‌ڕ دژی داعش ڕایگه‌یاندوووه که سه‌رباری بوونی ته‌حه‌ددیات و هه‌ڕه‌شه‌ی زۆر هه‌رێمی كوردستان یه‌كێكه له سه‌ركه‌وتووترین ناوچه‌كانی ڕۆژهه‌ڵاتی ناوه‌ڕاست.
جێمز جێفرى ڕاشی‌گه‌یاندوووه که تێكشكاندنی تیرۆر و به‌دیهێنانی سه‌قامگیری ئه‌وله‌وییه‌تی سه‌ره‌كیی ئه‌مه‌ریكایه له ناوچه‌كه‌دا.
هه‌روه‌ها له دیداره‌که‌دا له‌باره‌ی بارودۆخی سووریا و دوا پێشهاته سیاسی و مه‌یدانییه‌كان و نیگه‌رانی و پێشنیاره‌كان له‌مه‌ڕ ئاینده‌ی كورد له سووریا گفتوگۆى له‌سه‌ر کراوه و پێویستیى هه‌ماهه‌نگی و كاری هاوبه‌شی نێوان هه‌ردوولا به مه‌به‌ستی دابین كردنی سه‌قامگیری و ڕێگه‌گرتن له شه‌ڕ و كاولكاری و ئازار و نه‌هامه‌تی بۆ گه‌لی كورد له سووریا جه‌ختى له سه‌ر کراوه‌ته‌وه.
هه‌ر له‌و كۆبوونه‌وه‌یه‌دا هه‌ڕه‌شه‌كانی تیرۆریستان بۆ سه‌ر ئاسایشی ناوچه‌كه خرایه به‌ر باس و گفتوگۆ و ئه‌وه دووپات كرایه‌وه كه هه‌ماهه‌نگی و كاری هاوبه‌شی هاوپه‌یمانان و هه‌رێمی كوردستان سه‌ركه‌وتن و ئه‌نجامی زۆر ئیجابی له تێكشكاندن و پاشه‌كشه‌كردن به تیرۆر لێ كه‌وتوووه‌ته‌وه.
به‌رده‌وامیی هه‌ماهه‌نگیی نێوان هه‌ردوولا و په‌یوه‌ندییه‌كانی هه‌رێم و به‌غدا و هه‌روه‌ها پڕۆسه‌ی سیاسیی هه‌رێم ته‌وه‌ری دیكه‌ی ئه‌و كۆبوونه‌وه‌یه بوون.
کۆدی هه‌واڵنێر: 60103
Your Comment