بەپێی هەواڵی کوردپرێس، لە ڕێوڕەسمێکدا کە بە بۆنەی 20ەمین ساڵیادی دەستگیر کردنی عەبدوڵڵا ئۆجەلان سەرکردەی پەکەکە لە مەجلیسی ئەعیانی بەریتانیا بەڕێوەچوو سەرەتا لورد مائۆریک گلسمن وتەی پێشکەش کرد و لە وتەکانیدا جەختی کردەوە لەسەر پشتگیری کردنی وڵاتەکەی لە هەدەپە و کوردەکانی سووریا.

لای خۆشیەوە هۆشیار ئوزسوی نوێنەری پارتی دیموکراتیکی گەلان ڕەخنەی توندی لە سیاسەتەکانی وڵاتەکەی هەمبەر کورد و ڕەوتەکانی دیکە گرت و ڕایگەیاند: ڕۆژنامەوانان و سیاسەتوانان لە تورکیا زندانی کراون. لە ساڵانی ڕابردوودا چەندین شاری کوردییان خاپوور کردووە. ئێمە وەکوو هەدەپە درێژە بە بەرخۆدانەکانمام دەدەین.

ئیلهام ئەحمەد کە پێشتریش سەردانی ئەمریکا و فەڕانسای کردبوو لە وتەکانیدا ئاماژەی دا بە شەڕی ناوخۆیی لە سووریا و دەرفەتێک کە بۆ کورد ڕەخساوە و وتی: کوردەکان بە باشترین شێوە کەڵکیان لە چانسێک کە لە ساڵی 2011 ڕووبەڕوویان بوویەوە وەرگرت. دامەزرێنەری ئەم بیرۆکەیە ئوجەلانە کە ئێستا لە ژێر گوشاری دەوڵەتی تورکیایە.

کۆدی هەواڵنێر: 60113