بەپێی هەواڵی کوردپرێس، نووسینگه‌ى راگه‌یاندنى سه‌رۆكایه‌تى كۆمارى عێراق بڵاوی كرده‌وه، به‌رهه‌م ساڵح له كۆشكی سه‌لام له به‌غدا، له‌گه‌ڵ فه‌رمانده‌ی هێزه‌كانی سوپای ولایهته یه‌كگرتووه‌كانی ئه‌مریكا له خۆرهه‌ڵاتی ناوه‌ڕاست جه‌نه‌ڕاڵ جۆزیف فۆتیل و شاندی یاوه‌ری كۆ بووەته‌وه.
به‌پێى ڕاگه‌یاندنى سه‌رۆكایه‌تى كۆمار، كۆبوونه‌وه‌كه سه‌باره‌ت بە ڕه‌وشی ئه‌منی ناوچه‌كه و جه‌نگی دژ به تیرۆر له عێراق و سووریا و هه‌وڵه‌كان بۆ كۆتایی هێنان به رێكخراوی داعش و ڕاگه‌یاندنی سه‌ركه‌وتنی یه‌كجاری گفتوگۆ كراون.
له كۆبوونه‌وه‌كه‌دا، سه‌رۆک به‌رهه‌م ساڵح دووپاتی گرنگیی به‌ره‌وپێش بردنی هاریكاری ئه‌منی و سه‌ربازی نێوان هه‌ردوو وڵات و به‌شداری ولایهته یه‌كگرتوه‌كانی ئه‌مریكا له پڕچه‌ک كردن و پێشخستنی توانا سه‌ربازییه‌کانی عێراق كردۆته‌وه.
هاوكات، سه‌رۆک كۆماری عێراق هاریكاری و پابه‌ندبوونی كۆمه‌ڵگه‌ی نێوده‌وڵه‌تی به‌پێویست زانى له پێشكه‌ش كردنی كۆمه‌ک و پشتیوانی ئه‌و وڵاتانه‌ی كه‌به‌هۆی جه‌نگی دژ به‌تیرۆر زیانیان لێكه‌وتووه، و رۆڵی ولایهته یه‌كگرتووه‌كان و هاوپه‌یمانی نێوده‌وڵه‌تی له تێکشاندنی تیرۆریستانی داعشدا به‌رز نرخاند.
هه‌روه‌ها له كۆبوونه‌وه‌كه‌دا، جه‌نه‌ڕاڵ جۆزیف فۆتیل پابه‌ندبوونی وڵاته‌كه‌ی بۆ پشتیوانی كردنی هێزه ئه‌منییه‌كانی عێراق دووپات كرده‌وه له مه‌شق و پڕچه‌ک كردن و به‌رز كردنه‌وه‌ی ئاستی توانای سه‌ربازییان.
فه‌رمانده‌ی هێزه‌كانی سوپای ئه‌مریكا له خۆرهه‌ڵاتی ناوه‌ڕاست ئاماژه‌ى بۆ ئه‌وه‌ش كردوه، كه جه‌خت له سه‌روه‌ریی عێراق ده‌كه‌نه‌وه و بوونی هه‌ر هێزێكیش به مه‌به‌ستی پشتیوانی له جه‌نگی دژ به تیرۆر، به ره‌زامه‌ندیی حكوومه‌تی عێراق بووه له چوارچێوه‌ی ئه‌و ئامانجانه‌ی له سه‌ری رێككه‌وتوون.
سەرچاوە: مەوازین نیووز
کۆدی هەواڵنێر: 60113
Your Comment