به‌پێی هه‌واڵی کوردپرێس، ئێواره‌ی ڕۆژی سێشه‌ممه 29-1-2019 عادل عه‌بدولمه‌هدی سه‌رۆکوه‌زیرانی عێراق له کۆنگره‌ی ڕۆژنامه‌ڤانی هه‌فتانه‌ی خۆیدا فه‌رمانی دیوانی بۆ پێکهێنانی ئه‌نجومه‌نی باڵای نه‌هێشتنی گه‌نده‌ڵی ده‌رکرد.
هه‌ر له کۆنگره ڕۆژنامه‌ڤانییه‌که‌دا سه‌رۆکوه‌زیرانی عێراق گوتی: "کار ده‌که‌ین بۆ ئه‌وه‌ی ئابووری عێراق له پشتبه‌ستن به نه‌وت ڕزگار بکه‌ین وه‌ک تاکه داهاتی وڵات. به‌م نزیکانه‌ش پڕۆژه‌یێکی گه‌وره بۆ چاره‌سه‌رکردنی قه‌یرانی نیشته‌جێبوون ڕاده‌گه‌یێنین".
عادل عه‌بدولمه‌هدی ڕاشیگه‌یاند: پلانێکی گشتگیریان بۆ پێداچوونه‌وه به دۆسیه‌ی به‌رهه‌مهێنان و دابه‌ش کردنی کاره‌با هه‌یه و به‌دواداچوونیش بۆ دۆسیه‌ی باران و لافاو ده‌که‌ن و تاوه‌کوو ئێستا زیانی زۆر گه‌وره تۆمار نه‌کراون.
ناوبراو له‌باره‌ی په‌یوه‌ندییه‌کانی ئۆردۆن و عێراق ئاماژه‌ی به‌وه کرد که ئۆردۆن گومرگ له‌سه‌ر که‌لوپه‌لی هاتوو بۆ عێراق له ڕێگه‌ی به‌نده‌ری عه‌قه‌به که‌م ده‌کاته‌وه له به‌رامبه‌ردا نرخی نه‌وتیان بۆ که‌م ده‌کرێته‌وه و ئۆردۆن داوای کردوووه ڕۆژانه 10 هه‌زار به‌رمیل نه‌وت به نرخی برێنتی داشکێنراویان پێبدرێت.
سه‌رچاوه: ڕووداو
کۆدی هه‌واڵنێر: 60103
Your Comment