به‌پێی هه‌واڵی کوردپرێس، ڕوانگه‌ی سووری بۆ مافه‌کانی مرۆڤ ڕای‌گه‌یاند که دره‌نگانی شه‌وی ڕابردوو نزیکه‌ی 200 بارهه‌ڵگری پڕ له چه‌ک و که‌ره‌سته‌ی سه‌ربازی و لۆجیستی له ڕێگای هه‌رێمی کوردستانه‌وه گه‌یه‌نراوه‌ته بنکه‌کانی هاوپه‌یمانان له ناوچه‌کانی ڕۆژهه‌ڵاتی فورات (مه‌نبه‌ج و ڕه‌قه).
ڕوانگه‌ی سووری ڕای‌گه‌یاندوووه که له دوای بڕیاری کشانه‌وه‌ی هێزه‌کانی ئه‌مریکا له سووریا ئه‌مه دووه‌مین کاروانی سه‌ربازییه که له ڕێگای هه‌رێمی کوردستانه‌وه ڕه‌وانه‌ی ناو خاکی سووریا و هێزه‌کانی هاوپه‌یمانان کرابێت.
شایانی باسه؛ 19ی ئه‌م مانگه دۆناڵد تره‌مپ سه‌رۆکی ئه‌مریکا به بڕیارێکی فه‌رمی کشانه‌وه‌ی هێزه‌کانی وڵاته‌که‌ی له سووریا ڕاگه‌یاند و ئه‌و بڕیاره‌ش کاردانه‌وه‌ی جیاوازی ناوخۆ و ده‌ره‌وه‌ی کوردستانی لێکه‌وته‌وه و ئاژانسی هه‌واڵی ڕۆیته‌رز له زاری چه‌ند به‌رپرسێکی ئه‌مریکاوه بڵاوی کرده‌وه که واشنتۆن پلانی هه‌یه چه‌که‌کانی له یه‌کینه‌کانی پاراستنی گه‌ل (یه‌په‌گه) وه‌رنه‌گرێته‌وه و ئه‌وه‌ش وه‌ک هه‌نگاوێکی واشنتۆن لێکده‌درێته‌وه بۆ دڵنیاکردنه‌وه‌ی هاوپه‌یمانه کورده‌کانی که ده‌ستبه‌رداریان نابێت.
کۆدی هه‌واڵنێر: 60103
Your Comment