به‌پێی هه‌واڵی کوردپرێس، به‌رزان ئه‌حمه‌د كورده‌ ئه‌ندامی سه‌ركردایه‌تیی یه‌كێتی به ‌SNNی ڕاگه‌یاند: "ئێمه‌ له‌ ڕێگه‌ی په‌یوه‌ندییه‌كانمانه‌وه‌ له‌گه‌ڵ توركیا هه‌وڵه‌كانمان خستۆته‌گه‌ڕ بۆ ئه‌وه‌ی قه‌ناعه‌ت به‌و وڵاته‌ بكه‌ین، تاوه‌كوو گه‌شته‌كانی له‌گه‌ڵ فڕۆكه‌خانه‌ی نێوده‌وڵه‌تیی سلێمانی بكاته‌وه‌ چوونكه‌ له‌ ئه‌نجامی ئه‌و بڕیاره‌ خه‌ڵک زیانی پێده‌گات و فڕۆكه‌خانه‌ش موڵكی گشتییه‌ و سوودی بۆ هاووڵاتییان هه‌یه‌".

له‌ چه‌ند ڕۆژی ڕابردووشدا توركیا جارێكی دیكه ‌و بۆ ماوه‌ی سێ مانگ ڕاگرتنی گه‌شته‌كانی وڵاته‌كه‌ی بۆ فڕۆكه‌خانه‌ی نێوده‌وڵه‌تیی سلێمانی درێژ كرده‌وه‌ و له‌و ڕوووه‌شه‌وه‌ به‌رزان ئه‌حمه‌د كورده‌ وتیشی: "له ‌گفتوگۆكانماندا داوامان كردوووه‌ توركیا به‌و ‌بڕیاره‌یدا بچێته‌وه‌ به‌ڵام تا ئێستا واده‌یێک دیاری نه‌كراوه‌ و ئێمه‌ش به‌رده‌وامین له ‌هه‌وڵه‌كانمان".

ئه‌و سه‌ركردایه‌تییه‌ی یه‌كێتیی ڕاگرتنی گه‌شته‌ نێوده‌وڵه‌تییه‌كانی فڕۆكه‌خانه‌ی سلێمانی به‌ سیاسی ناو برد و وتی: "ڕاگرتنی گه‌شتی ئاسمانیی فڕۆكه‌خانه‌ی نێوده‌وڵه‌تیی سلێمانی و توركیا كاروبارێكی ئیداریی و كارگێڕیه و ناكرێت به‌ سیاسی بكرێت".

کۆدی هه‌واڵنێر: 60103