به‌پێی هه‌واڵی کوردپرێس، ڕۆژی یه‌کشه‌ممه 23ی کانوونی یه‌که‌می 2018 ڕه‌جه‌ب ته‌ییب ئه‌ردۆغان سه‌رکۆماری تورکیا په‌یوه‌ندییێکی ته‌له‌فۆنی له‌گه‌ڵ دۆناڵد تره‌مپ سه‌رکۆماری ئه‌مریکا ئه‌نجام دا و ئه‌ردۆغان له ھه‌ژماری تایبه‌تی خۆی له تۆڕی کۆمه‌ڵایه‌تیی توویته‌ردا زانیاری له‌باره‌ی ناوه‌ڕۆکی په‌یوه‌ندییه ته‌له‌فۆنییه‌که ئاشکرا کرد.
ئه‌ردۆغان نووسیویه‌تی: "په‌یوه‌ندییێکی ته‌له‌فۆنیی ئه‌رێنیمان له‌گه‌ڵ سه‌رۆکی ئه‌مریکا ئه‌نجام دا و له میانیدا باسی په‌یوه‌ندیی بازرگانی و پێشھاته‌کانی سووریا و چه‌ندین بابه‌تمان کرد و له‌باره‌ی زیاترکردنی ھاریکاری ڕێککه‌وتووین و ھیوادارم گفتوگۆ‌که ببێته مایه‌ی خێر بۆ وڵاته‌که‌مان و ناوچه‌که".
سه‌رکۆماری ئه‌مریکاش له توویتێکدا ڕای‌گه‌یاند که گفتوگۆیێکی درێژ و به‌رهه‌مدارمان له‌گه‌ڵ سه‌رۆک کۆماری تورکیا کردوووه و باسى پرسى داعشمان کرد.
سه‌رۆکى ویلایه‌ته یه‌کگرتوووه‌کانی ئه‌مریکا ڕای‌ده‌گه‌یێنێت که کشانه‌وه‌ى هێزه‌کانمان له سووریا هێواش و له‌سه‌ر خۆ ده‌بێت و دواى چه‌ندین ساڵ ده‌گه‌ڕێنه‌وه وڵاتى خۆیان و هه‌ماهه‌نگیى ته‌واویان له‌گه‌ڵ تورکیا ده‌بێت
شایانی باسه که له كاردانه‌وه‌ی بڕیاره‌كه‌ی تره‌مپ بۆ كشانه‌وه‌ی هێزه‌كانی وڵاته‌كه‌ی له سووریا، هه‌ریه‌ک له وه‌زیری به‌رگری و نێرده‌ی تایبه‌تی سه‌رۆكی ئه‌مریكا بۆ هاوپه‌یمانیی شه‌ڕی دژی داعش ده‌ستیان له‌كار كێشایه‌وه.
سه‌رچاوه: هه‌واڵده‌ریی ئه‌نادۆڵو
کۆدی هه‌واڵنێر: 60103
Your Comment