بەپێی هەواڵی کوردپرێس، كاروانی یەكەم كە 20 خێزان بوون گەیشتنە پاریس، كریستۆڤ كاستانەر، وەزیری ناوخۆی فەرەنساش دەڵێت ئەو خێزانانە لە ناوچە جیاجیاكانی وڵاتەكەی نیشتەجێ دەكرێن.

نادیە موراد كچە چالاكوانی ئێزدی و براوەی خەڵاتی نۆبڵ بۆ ئاشتی، پێشتر داوای لە ئیمانوێل ماكرۆن سەرۆكی فەرەنسا كردبوو، ژمارەیێک خێزانی لێقەوماو وەربگرێت و لە وڵاتەكەیدا نیشتەجێیان بكات.

زۆربەی ئەو خێزانە ئێزدییانه‌ی كە فەرەنسا وەریانگرتوون، ھاوسەرەكانیان بەدەستی داعش كوژراون و بەشێكیشییان پێشتر لەبندەستی داعشدا بوون، تەنانەت ژمارەیێكیان ھیچ زانیارییەكیان لەسەر كەسوكاریان و منداڵەكانیان نیيە كە لە ژێردەستی چەكدارانی رێكخراوەكەدا ماون.

دیدێ لیشێ، بەڕێوەبەری نوسینگەی كۆچبەران لە فەرەنسا ده‌ڵێت: "زۆربەی ئەوانەی ھاتوون ھاوسەرەكانیان بەدەستی داعش كوژراون، بەشێكیشییان كەوتبوونە دەست داعشەوە، زۆریان مەینەتی دیوە، ھەندێكیان ھیچ زانیارییێكیان لەسەر كەسوكاریان و منداڵەكانیان نيیە، بۆیە پێویستییان بە ئاوڕلێدانەوە ھەیە بە تایبەت لەڕووی دەروونیەوە".

بەگوێرەی ئامارەكان، لە ساڵی 2014 و داگیركاری داعشدا، زیاتر لە 3 ھەزار ژن و منداڵی كوردی ئێزدی كەوتنە دەست چەكدارانی رێكخراوەكە و ژمارەیێكی زۆریان رزگاركران، بەڵام چارەنووسی ژمارەیێكی زۆریان نادیارە.

کۆدی هەواڵنێر: 60113