عه‌بدولکه‌ریم سارۆخان له گفتوگۆیێکی تایبه‌ت له‌گه‌ڵ ئاژانسی هه‌واڵی کوردپرێسدا ئاماژه‌ی به جووڵه سه‌ربازییه‌کانی سوپای تورکیا له سنووری سووریا کردوووه و ده‌ڵێت: هه‌ڕه‌شه‌کانی ئه‌ردۆغان له‌باره‌ی کوردستانی سووریاوه جیدین و ئێمه به مه‌ترسیی ده‌زانین چوونکه ئه‌و هه‌ڕه‌شانه تازه نیین و له ماوه‌ی 7 ساڵی ڕابردوودا ناوچه‌که‌ی ئێمه به‌رده‌وام هه‌ڕه‌شه‌ی له‌سه‌ر بوووه و تورکیا ده‌ستدرێژیی کردۆته سه‌ر خاکمان.
ناوبراو درێژه‌ی پێدا: تورکیا هه‌رکات هه‌ڕه‌شه‌ی هێرشکردنی کردبێت هێرشه‌که‌شی کردوووه دوایین نموونه‌شی عه‌فرین بوو که تورکیا ده‌ستدڕێژیی کرده سه‌ر ئه‌و کانتۆنه کوردنشینه و ئه‌و به‌شه‌ی خاکی سووریای جیا کرده‌وه.
عه‌بدولکه‌ریم سارۆخان گوتیشی: ئه‌مڕۆکه‌ش هه‌مان هه‌ڕه‌شه به‌رده‌وامه به‌ڵام ئێمه ته‌واو ئاماده‌ین و وه‌ڵامی هه‌موو هه‌ڕه‌شه‌یێک ده‌ده‌ینه‌وه و بێده‌نگ نابین. هێزه‌کانی ئێمه له بواری سه‌ربازی و سیاسی و کۆمه‌ڵایه‌تی و ته‌شکیلاتیدا خۆیان ئاماده کردوووه که به‌رپه‌رچی ده‌ستدرێژییه‌کانی تورکیا بده‌نه‌وه.
سه‌رۆک وه‌زیرانی کانتۆنی جزیره دووپاتی کرده‌وه وه‌ڵامیان ده‌بێت بۆ هه‌ڕه‌شه‌کانی تورکیا و ده‌شڵێت: ئه‌گه‌ر بێتوو ئه‌ردۆغان هێرش بکاته سه‌ر خاکی کوردستانی سووریا ده‌دۆڕێت له‌به‌ر ئه‌وه‌ی ئێمه شکستمان به گرووپێکی تیرۆریستیی جیهانی هێنا که داعش بوو بۆیه شکست به تورکیاش ده‌هێنین.
ناوبراو ئاشکراشی کرد: هیچ ڕه‌گه‌ز و نه‌ته‌وه و عه‌شیره و گرووپێکی سیاسیی دانیشتووی باکووری سووریا له به‌رانبه‌ر ده‌ستدرێژییه‌که‌ی تورکیاوه بێده‌نگ نابن و هه‌ڵوێستیان ده‌بێت. خه‌ڵکی ئێمه چیتر ئه‌و خه‌ڵکه‌ی ساڵانی پێشوو نیین له‌به‌ر ئه‌وه‌ی ئێستا به هه‌موو توانا و هێزی خۆیانه‌وه ئاماده‌ی به‌رگری کردن له خاکه‌که‌یانن.
سارۆخان هه‌ر له‌و دیمانه‌ی خۆی له‌گه‌ڵ ئاژانسی کوردپرێسدا تیشکی خسته سه‌ر ده‌وربینینی ئه‌مریکا و هاوپه‌یمانیی وڵاتانی ڕۆژئاوا بۆ ڕێگری کردن له هێرشه‌که‌ی تورکیا و به کوردپرێسی گوت: ئه‌مه‌ریکا له باکوور و ڕۆژهه‌ڵاتی سووریا بوونی هه‌یه. ئێمه له‌و قه‌ناعه‌ته‌دا نیین که ئه‌مه‌ریکا بیهه‌وێت خزمه‌تی ئێمه بکات یان یارمه‌تیمان بدات به‌ڵام بڕوا ناکه‌ین هێرشه‌که‌ی تورکیا بۆ سه‌ر کوردستانی سووریا به قازانجی داهاتووی ئه‌مه‌ریکاش و هاوپه‌یمانیی ڕۆژئاوایش بێت.
ناوبراو ئه‌وه‌شی زیاد کرد: ئه‌گه‌ر ته‌نانه‌ت ئه‌مه‌ریکا و وڵاتانی ڕۆژئاوا مامه‌ڵه بکه‌ن و ڕێگه به هێرشه‌که‌ی تورکیا بده‌ن هه‌موو شتێک به‌ستراوه به ئاستی به‌رخۆدان و خۆڕاگریی ئێمه له به‌رانبه‌ر ده‌ستدرێژییه‌کانی تورکیا.
سه‌رۆک وه‌زیرانی جزیره ئاماژه‌ی به ئامانجه‌کانی تورکیا له‌و هێرشه‌ی بۆ باکووری سووریا کرد و به هه‌واڵنێری کوردپرێسی ڕاگه‌یاند: تورکیا حه‌ز ده‌کات داعش له سووریا ده‌سه‌ڵاتی زیاتری هه‌بێت و ئه‌و هێرشانه‌ی ئێمه له هه‌جین دژی داعش کردمان نموونه‌یێکه که تورکیا ده‌یهه‌وێت دووپات نه‌بێته‌وه له‌به‌ر ئه‌وه‌ی هیوای به گرووپه تیرۆریستییه‌کانه و ئه‌گه‌ر ئه‌و گرووپانه نه‌مێنن شکست ده‌هێنێت.
ناوبراو له کۆتاییدا گوتیشی: ئه‌ردۆغان ده‌یهه‌وێت گوشاری سه‌ر داعش سووک بکرێت و به‌و شێوازه‌ش سه‌ری کێشه نێوخۆیییه‌کانی تورکیا بنێته‌وه.
کۆدی هه‌واڵنێر: 60103
Your Comment