به‌پێی هه‌واڵی کوردپرێس، سه‌عدوڵڵا مه‌سعوودیان، سه‌ركونسووڵی كۆماری ئیسلامیی ئێران له سلێمانی له میانی به‌شداری كردنی له كۆنفرانسی نێوده‌وڵه‌تیی هاوبه‌ش له نێوان (زانكۆی پۆلیته‌كنیكی سلێمانی و زانكۆی سلێمانی و زانكۆی كوردستان- سنه) كه بۆ ماوه‌ی دوو ڕۆژ له شاری سلێمانی به‌رده‌وام ده‌بێت وتی: گه‌مارۆ ئابوورییه‌كانی سه‌ر ئێران هۆكاره بۆ په‌کخستنی كار و جووڵه‌ی بازرگانی له هه‌رێمی كوردستاندا و توند كردنه‌وه‌ی ئه‌و سزایانه‌ش چه‌ند كاریگه‌ری له‌سه‌ر ئێران هه‌بێت ئه‌وه‌نده‌ش بۆ وڵاتانی دراوسێ و ده‌وروبه‌ر كاریگه‌ری هه‌یه.
ناوبراو وتیشی: داواكارم ڕێكخراوه‌كانی كه‌رتی تایبه‌ت له هه‌رێمی كوردستان له دادگای تاوانی نێوده‌وڵه‌تی سكاڵا تۆمار بكه‌ن ده‌رهه‌ق به په‌کخستنی جووڵه‌ی بازرگانی و ئابووری هه‌رێم كه به‌هۆی گه‌مارۆكان، ئه‌و كه‌رته گرنگه پریشكی په‌ككه‌وتنی به‌رده‌كه‌وێت.
سه‌ركونسووڵی كۆماری ئیسلامیی ئێران له سلێمانی به تایبه‌ت داوای له ژووره بازرگانییه‌كان و یه‌كێتییه‌كانی هاورده و هه‌نارده و به‌ڵێنده‌ران و وه‌به‌رهێنه‌رانی كوردستان كرد له ڕێگه‌ی دادگای تاوانی نێوده‌وڵه‌تی ئه‌و مافه وه‌ربگرنه‌وه كه ئه‌مریكا به هۆی گه‌مارۆكانی سه‌ر ئێران له هه‌رێمی زه‌وت كردوووه كه له له‌ده‌ستدانی هه‌لی كار و وه‌ستانی پڕۆژه‌ی هاوبه‌ش و په‌ككه‌وتنی جووڵه‌ی بازرگانی و ئابووری به‌ر هه‌رێم ده‌كه‌وێت.
له چه‌ند رۆژی ڕابردوودا شاندێكی كارگێڕی و ئابووری كۆماری ئیسلامیی ئێران كه پێكهاتبوون له ژماره‌یێک په‌رله‌مانتار و پارێزگاری سنه و بازرگانان و به‌رپرسانی خاڵه سنوورییه‌كان سه‌ردانی شاری سلێمانیان كرد و له‌گه‌ڵ پارێزگاری سلێمانیدا كۆ بوونه‌وه.
له پاش ئه‌نجامدانی سیمینارێكی هاوبه‌ش، پارێزگاری سلێمانی ڕایگه‌یاند که پێشنیازیان بۆ شاندی ئێرانی كردوووه ده‌روازه‌ی لاوه‌كی و خاڵی ئاڵوگۆڕی بازرگانی بكرێنه‌وه، به‌مه‌ش هه‌لی كار بۆ 100 هه‌زار كه‌س ده‌ڕه‌خسێت.
سه‌رچاوه: خه‌ڵک
کۆدی هه‌واڵنێر: 60103
Your Comment