بەپێی هەواڵی کوردپرێس، ناوەندی راگەیاندنی هێزەکانی سووریای دیموکرات رایگەیاند: "لە باکووری شارۆچکەی هەجین لە باشووری رۆژهەڵاتی دێرەزوور، شەڕ و پێکدادان لە نێوان شەڕڤانان و داعش رووی داوە، لە ئەنجامی 24 کاژێری پێکدادانەکاندا 88 چەکداری داعش کوژراون و ژمارەیەکیشیان لێ بریندار بوون."

هەسەدە باسیشی لەوە کردووە، 300 کەسی سڤیلیشیان لەدەست چەکدارانی داعش رزگار کردووە.

ناوەندی راگەیاندنی هەسەدە لەبارەی زیانەکانیش ئاماژەی بەوەکردووە، جگە لە کوژرانی 88 چەکداری داعش، شەڕڤانان لە میحوەری رۆژهەڵاتی هەجین پێشڕەوییان کردووە، بەهۆی بۆردوومانی فڕۆکەی جەنگی هاوپەیمانیی نێودەوڵەتی 12 چەکداری داعش کوژراون.

دوایین قۆناخی ئۆپەراسیۆنی دژی داعش لە دێرەزوور لە 10-9-2018 لەلایەن شەڕڤانانی هەسەدە دەستیپێکرا.

لە تۆڕی میدیاییی رووداو وەرگیراوە

کۆدی هەواڵنێر: 60113