به‌پێی هه‌واڵی کوردپرێس، به‌رپرسانی شانده‌که‌ی عێراق و به‌رپرسانی ده‌روازه‌ی پشته له سنووری گه‌رمیان ڕای‌ده‌گه‌یێنن که پێده‌چێ ئه‌مه کۆتا سه‌ردانی شاندی به‌غدا بێت و بڕیار له‌باره‌ی به‌نێوده‌وڵه‌تی کردنی بدرێت.
شاكر جبووری به‌ڕێوه‌به‌ری گواستنه‌وه و گه‌یاندن له ده‌سته‌ی ده‌روازه سنوورییه‌كانی عێراق ده‌ڵێت: "هاوئاهه‌نگی و په‌رۆشی حكوومه‌تی هه‌رێمی كوردستانمان بینی له ده‌روازه سنوورییه‌كانیدا، هه‌وڵدان بۆ چاره‌سه‌ری گرفته‌كان و لادانی به‌ربه‌سته‌كان له‌پێناوی هه‌ستانه‌وه‌ی به‌ره‌وپێشبردن له ڕووی بازرگانی و جوانی ده‌روازه‌كان ئه‌وه‌ش له‌پێناو خزمه‌ت كردنی خه‌ڵكی هه‌رێمی كوردستان به‌تایبه‌تی و عێراق به‌گشتی. ئامانجی ئێمه‌ش ئه‌كتیڤ كردنی ده‌روازه‌که‌یه له ڕووی ژێرخانه‌وه بۆ به‌ره‌وپێشبردنی ده‌روازه‌كه و دوای بینینی ڕاپۆرتی ئێمه دڵنیام له به‌غداوه هه‌واڵی خۆش ده‌گات".
ناوبراو گوتیشی که 14 فه‌رمانگه‌ی سه‌ر به حكوومه‌تی هه‌رێمی كوردستان ئێستا له ده‌روازه‌كه‌دا هه‌ن و گۆڕه‌پانی وه‌ستانی ئۆتۆمبێل، ڕێگه‌وبان و شورا ته‌واو كراون.
حوسێن ئه‌حمه‌د به‌ڕێوه‌به‌ری گومرگی گه‌رمیانیش ده‌ڵێت: ''ڕۆاژنه 200 ئۆتۆمبێل هاتوچۆ ده‌كه‌ن. ئه‌مڕۆ هه‌موو ده‌زگاكانمان هێنا و به شانده‌که‌مان ئاشنا کردن. دڵنیام كۆتا سه‌ردان ده‌بێت و ده‌روازه‌كه ده‌كه‌نه ده‌روازه‌یێكی نێوده‌وڵه‌تی. پاراستنی ده‌روازه‌كه له ئه‌ستۆی پۆلیسی گومرگ و هێزه‌كانی پاسه‌وانی سنوور و ئاسایشی گه‌رمیاندایه. هه‌زار و 847 ئۆتۆمبێلی بارهه‌ڵگر له ده‌روازه‌ی پشته كار ده‌كه‌ن. به‌پێی ئاماری گومرگی گه‌رمیان له ماوه‌ی چوار مانگی ڕابردوودا داهاتی ئه‌و ده‌روازه سنوورییه پێنج ملیار دینار بوووه.
له نێوان ھه‌رێمی کوردستان و کۆماری ئیسلامیی ئێراندا سێ ده‌روازه‌ی نێوده‌وڵه‌تی و چوار مه‌رزی لاوه‌کی بوونیان ھه‌یه که بریتین له ده‌روازه‌کانی په‌روێزخان و باشماخ و حاجی ئۆمه‌ران، له‌گه‌ڵ مه‌رزه لاوه‌کییه‌کانی (پشته و ته‌وێڵه له ھه‌ڵه‌بجه و سه‌یرانبه‌ن له سلێمانی و کێلێ له ده‌ڤه‌ری ڕاپه‌ڕین.)
سه‌رچاوه: ڕووداو
کۆدی هه‌واڵنێر: 60103
Your Comment