بەپێی هەواڵی کوردپرێس، نووسینگه‌ی راگه‌یاندنی سه‌رۆک وه‌زیرانی عێراق بڵاوی کردەوە ئه‌مڕۆ ئه‌نجوومه‌نی وه‌زیرانی عێراق، به سه‌رۆکایه‌تی مسته‌فا کازمی، سه‌رۆکی حکوومه‌ت کۆ بووه‌وه و کۆبوونه‌وه‌که به دوایین کۆبوونه‌وه‌ی ئه‌نجوومه‌نی وه‌زیرانی عێراق له ئه‌مساڵدا هه‌ژمار ده‌کرێت.
له به‌رایی کۆبوونه‌وه‌که‌دا مسته‌فا کازمی وتارێکی پێشکه‌ش کرد و له وتاره‌که‌دا تیشکی خسته سه‌ر گۆڕانکارییه هه‌نووکه‌ییه‌کانی عێراق و په‌یوه‌ندییه‌کانی نێوان هه‌ولێر و به‌غدا.
پوخته‌ی گرنگترین وته‌کانی مسته‌فا کازمی:
* له ماوه‌ی ساڵ و نیوی رابردووی ته‌مه‌نی ئه‌م حکوومه‌ته‌ماندا، رووبه‌ڕووی ئاڵنگاری گه‌وره بووینه‌وه. توانیمان له‌و رووبه‌ڕووبوونه‌وه‌یه‌دا سه‌رکه‌وین و ئه‌و ئاڵنگاریانه تێپه‌ڕێنین و ئه‌وه‌ی ماوه کاتی زیاتری پێویست بووه.
* هه‌موو ئه‌وه‌ی به‌ده‌ست هاتووه، به پشتیوانی هه‌موو وه‌زیره‌کانی کابینه و پشتیوانی گه‌لی عێراق و ئارامگری و دانایی و به‌رگه‌گرتنی ره‌و ره‌وشه بووه. ئه‌وه‌ی به‌ده‌ستمان هێناوه شانازی پێوه ده‌که‌ین و ده‌یپارێزین. پێویسته حکوومه‌تی داهاتووش پارێزگاری له‌و رێباز و ده‌ستکه‌وتانه بکات.
* ئێمه په‌ڕه‌ی سپی چاکسازیمان گه‌ڵاڵه کرد و ئه‌وه یه‌کێکه له ده‌ستکه‌وته‌کانمان و زۆر سوودی هه‌بووه و بڕێکی زۆری سامانی بۆ گه‌نجینه‌ی ده‌وڵه‌ت گێڕاوه‌ته‌وه.
* سه‌ره‌ڕای هه‌وڵی هه‌ندێک بۆ درووستکردنی ژاوه‌ژاو له باره‌ی په‌ڕه‌ی چاکسازی، به‌ڵام توانرا به سوود و قازانجی که‌رتی گشتیی و به‌رژه‌وه‌ندی نیشتمانی بشکێته‌وه.
* ئێمه له ره‌وشێکی سه‌ختدا بووین، کۆرۆنا هات، نرخی نه‌وت دابه‌زی و سیسته‌می سیاسی و کۆمه‌ڵایه‌تی له لێواری داڕماندا بوو، به‌ڵام ئێمه به هۆی په‌ڕه‌ی سپی چاکسازییه‌وه سه‌رکه‌وتین و توانیمان زیاتر له 12 ملیار دۆلار بۆ یه‌ده‌گی بانکی ناوه‌ندی زیاد بکه‌ین و پۆلێنی عێراق له ئاستی ده‌سته‌به‌ری نێوده‌وڵه‌تی به‌رز بکه‌ینه‌وه.
* عێراق که‌وتبووه نێوان دوو به‌رداشه‌وه، ئێمه توانیمان له رووی په‌یوه‌ندییه‌کانی ده‌ره‌وه، له ماوه‌یه‌کی کورتدا، رۆڵی هه‌رێمایه‌تی، نێوده‌وڵه‌تی، عه‌ره‌بی و ئیسلامی بۆ عێراق بگێڕینه‌وه و له باشکردنی په‌یوه‌ندییه‌کانمان سه‌رکه‌وتوو بووین و ئێستا عێراق له ئامێز و که‌وانه‌ی زۆرێک له ده‌سته‌کانی دایه له دراوسێیان و هاوڕێ باشه‌کانی.
*سه‌رکه‌وتوو بووین له ره‌خساندنی که‌شێکی هه‌رێمایه‌تی گونجاو و سه‌رکه‌وتنمان به‌ده‌ستهێنا له په‌یوه‌ندییه نێوده‌وڵه‌تییه‌کانمان بۆ نزیکخستنه‌وه‌ی روانگه‌ی لایه‌نه ناکۆکه‌کان و پاراستنی ناوچه‌که له کاریگه‌رییه‌کانی شه‌ڕ، که ئه‌گه‌ر رووی دابوایه، عێراق زیانمه‌ندی سه‌ره‌کی ده‌بوو.
*هه‌وڵی زۆرمان دا بۆ پاراستنی گه‌له‌که‌مان له په‌تای کۆرۆنا و سه‌ره‌ڕای ئه‌وه‌ی ئه‌وه قه‌یرانێکی نێوده‌وڵه‌تی بوو، توانیمان باشترین پێکوته بۆ خه‌ڵکی خۆمان دابین بکه‌ین. به‌رده‌وامیشین له کارکردن له‌و بواره‌دا.
* له بواری وزه بۆ یه‌که‌مجار کارمان کرد بۆ ئه‌وه‌ی پشت به وزه‌ی پاک ببه‌ستین و ناوی وه‌زاره‌تمان گۆڕی بۆ وه‌زاره‌تی کاره‌با و وزه‌ی جێگره‌وه و زۆر گرێبه‌ستمان له بواری وزه‌ی جێگره‌وه‌دا واژوو کردووه.
* په‌یوه‌ندییه‌کانمان له‌گه‌ڵ هه‌رێمی کوردستانی عێراق، له ماوه‌ی ئه‌م حکومه‌ته‌دا زۆر باشتر بووه له‌وه‌ته‌ی 2003ه‌وه و ئێمه شانازی به‌و په‌یوه‌ندییانه ده‌که‌ین و ئه‌و گرژیانه‌ی هه‌بوون له‌و ئاسته‌دا نه‌بوون و ئێمه بۆچوونی زۆرمان هه‌بووه و توانیومانه سووپاس و ستایش بۆ خودای گه‌وره به گفتوگۆ و بنیاتنانی ره‌گه‌زه‌کانی متمانه ئه‌و په‌یوه‌ندییه گرژانه بگۆڕین بۆ باشترین په‌یوه‌ندی.
* به هه‌موو رۆڵه‌کانی گه‌لی عێراق ده‌ڵێم: ئێمه پێویستمانه بۆ ده‌سته‌به‌رکردنی داهاتوومان باوه‌ڕمان ته‌نیا به دڵسۆزی و لایه‌نگری بۆ عێراق هه‌بێت.
* له کۆتایی ئه‌مساڵدا، رۆڵی شه‌ڕکاری هێزه‌کانی هاوپه‌یمانی نێوده‌وڵه‌تی دژ به داعش کۆتایی دێت و هێزه شه‌ڕکاره‌کان عێراقیان به‌جێهێشت و ئه‌مڕۆ هیچ سه‌ربازێکی هاوپه‌یمانییه‌که به سیفه‌تی ئه‌وه‌ی هێزی شه‌ڕکار بێت له عێراقدا نییه و ته‌نیا ژماره‌یه‌ک له راوێژکاره‌کان ماونه‌ته‌وه بۆ پشتیوانیکردن له هێزه‌کانمان و دابینکردنی پێداویستییه‌کانیان له شه‌ڕی دژ به تیرۆر و داعش.
* سوپای پاڵه‌وانی عێراق ده‌ستکه‌وتی گه‌وره‌ی به‌ده‌ستهێناوه. هه‌روه‌ک هه‌ریه‌ک له هێزه‌کانی به‌ره‌نگاربوونه‌وه‌ی تیرۆر، حه‌شدی شه‌عبی، پێشمه‌رگه، پۆلیسی ئیتیحادی سه‌رکه‌وتوو بوون له به‌ره‌نگاربوونه‌وه‌ی چه‌کداره په‌ڕاگه‌نده‌بووه‌کانی تیرۆر و زۆرێک له سه‌رگه‌وره‌کان و سه‌رکرده‌کانی ئه‌و چه‌کداره په‌ڕاگه‌نده‌بووانه کوژراون و به‌رده‌وامیش ده‌بین له راوه‌دوونان و کوشتنی ئه‌و چه‌کدارانه له هه‌ر کوێیه‌کی عێراقدا بن.
سه‌رچاوه: K24
Your Comment