بەپێی هەواڵی کوردپرێس، شانه‌ی ڕاگه‌یاندنی سه‌ربازی له ڕاگه‌یه‌ندراوێکدا بڵاویکرده‌وه، دوای ئه‌وه‌ی به سه‌رپه‌رشتی و پلاندانانی فه‌رمانده‌یی ئۆپه‌راسیۆنه هاوبه‌شه‌کان، هێزه ئه‌منیه‌کانی فه‌رمانده‌ی ئۆپراسیۆنه‌کانی دیاله و حه‌شدی شه‌عبی و هێزه تایبه‌ته‌کان و هێزی سوپای عێراق و دژه تیرۆر، له‌چه‌ند قۆڵێکه‌وه ئۆپراسیۆنێکی فراوانیان له‌سنووری زنجیره چیای حه‌مرین له پارێزگای دیاله ده‌ستپێکرد.
ئه‌وه‌شی راگه‌یاند، له‌ئه‌نجامی ئۆپراسیۆنه‌که، 5 تیرۆریستی داعش کوژران و 2 ته‌رمی هاوڵاتیانیش که پێشتر رفێندرابوون دۆزراونه‌ته‌وه، هه‌روه‌ها 23 مۆڵگه و حه‌شارگه‌ی تیرۆرستانیش خاپوورکراون.
باسی له‌وه‌ش کرد، له کاتی ئۆپه‌راسیۆنه‌که‌دا ده‌ستیان به‌سه‌ر 13 بۆمبی چێندراو، چه‌ندین جۆر چه‌ک و ته‌قه‌مه‌نی دیکه‌دا گرتووه، هه‌روه‌ها ده‌ستیان به‌سه‌ر ژماره‌یه‌ک پشتێنی بۆمبڕێژکراو و مۆلیده‌یه‌کی کاره‌با گرتووه.
Your Comment