کوردپرێس:
جینین پلاسخارت، نوێنه‌ری سكرتێری گشتیی نه‌ته‌وه یه‌كگرتووه‌كان له عێراق له كۆبوونه‌وه‌یه‌كدا له‌گه‌ڵ نێچیرڤان بارزانی، سه‌رۆكی هه‌رێمی كوردستان، جه‌ختی له‌وه كرده‌وه كه په‌یوه‌ندییێكی باشی نێوان هه‌ولێر و به‌غدا له به‌رژه‌وه‌ندیی ته‌واوی عێراقدایه، هه‌روه‌ها پشتگیریی نه‌ته‌وه یه‌كگرتووه‌كانی بۆ گفتوگۆی نێوان هه‌ردوولا ده‌ربڕی و هیوای خواست كێشه‌كانیان چاره‌سه‌ر بكه‌ن.
له كۆبوونه‌وه‌كه‌دا نێچیرڤان بارزانی وێڕای سوپاس و پێزانین بۆ ڕۆڵی گرنگی نه‌ته‌وه یه‌كگرتووه‌كان له عێراق، هیوای خواست له هاندانی هه‌ولێر و به‌غدا بۆ سه‌ركه‌وتنی گفتوگۆكان به‌رده‌وام بێت و له چاره‌سه‌ركردنی كێشه‌كانی نێوانیاندا هاوكار و یارمه‌تیده‌ر بێت.
هه‌روه‌ها جه‌ختی له‌وه كرده‌وه كه چاره‌سه‌ركردنی یه‌كجاره‌كی و گشتگیری كێشه‌كانی هه‌ولێر ـ به‌غدا، كلیلی سه‌قامگیریی عێراق و پێكه‌وه‌ژیانه و به ڕه‌چاوكردنی دۆخی سه‌ختی وڵات و ته‌حه‌دییه‌كانی به‌رده‌می، ده‌بێ ده‌سه‌ڵات و لایه‌نه عێراقییه‌كان به گیانێكی به‌رپرسانه مامه‌ڵه له‌گه‌ڵ دۆخه‌كه‌دا بكه‌ن و كێشه‌كان له‌سه‌ر بنه‌مای ده‌ستوور چاره‌سه‌ر و ڕێككه‌وتنه‌كانیش جێبه‌جێ بكرێن.
دۆخی سیاسی، ئه‌منی، ته‌ندروستی و ئابووریی عێراق، به‌ره‌نگاربوونه‌وه‌ی تیرۆر و ئه‌ركی هاوپه‌یمانیی نێوده‌وڵه‌تی له عێراق، هه‌ڵبژاردنه‌كانی داهاتووی وڵات، په‌ره‌سه‌ندنه‌كانی ناوچه‌كه به‌گشتی و چه‌ند پرسێكی دیكه‌ی مایه‌ی بایه‌خی هاوبه‌ش، ته‌وه‌رێكی دیكه‌ی كۆبوونه‌وه‌كه بوو.
Your Comment