به‌پێی هه‌واڵی کوردپرێس، ئه‌مڕۆ دووشه‌ممه 19ی تشرینی دووهه‌می 2018 سه‌عدی ئه‌حمه‌د پیره له چاوپێکه‌وتنێکدا له‌گه‌ڵ به‌شی کوردی ده‌نگی ئه‌مریکادا سه‌باره‌ت به کۆبوونه‌وه‌ی چه‌ند ڕۆژی رابردووی شاندی پارتی و یه‌کێتی له باره‌گای مه‌کته‌بی سیاسیی یه‌کێتی له سلێمانی ڕای‌گه‌یاند: "کۆبونه‌وه‌ی یه‌که‌م بوو له پاش هه‌ڵبژاردنی په‌رله‌مانی هه‌رێم و پێكهێنانی حكوومه‌تی نوێی عێراق، بۆ ئه‌وه بوو ڕێگا و شوێنی پێکه‌وه کارکردن له داهاتوودا پێكه‌وه دابنێین و بۆ ئه‌وه بوو که هه‌ڵه‌کانی ڕابردوو دووباره نه‌که‌ینه‌وه و سوود له‌و هه‌ڵانه وه‌ربگرین."
ناوبراو ئاماژه‌ی به‌وه‌ش کردوووه: له کۆبوونه‌وه‌ی داهاتوویاندا باس له یه‌کلایی کردنه‌وه‌ی کاندیداکانی سه‌رۆکی حکوومه‌ت و سه‌رۆکی په‌رله‌مانی کوردستان له‌لایه‌ن پارتی و یه‌کێتییه‌وه ده‌که‌ن و گفتوگۆی له‌سه‌ر ده‌که‌ن.
سه‌عدی پیره ڕه‌تی کردوووه‌ته‌وه له ناو یه‌کێتیدا ناکۆکی هه‌بێت له‌سه‌ر دیاری کردنی کاندیدێک بۆ پۆستی سه‌رۆکی په‌رله‌مانی کوردستان و ئاماژه به‌وه ده‌کات که ئه‌و هه‌واڵه دووره له ڕاستییه‌وه و هیچ بنه‌مایێکی نییه.
ناوبراو ده‌رباره‌ی مه‌رج و داواکارییه‌کانی یه‌کێتی بۆ به‌شداری کردن له کابینه‌ی نوێی حکوومه‌تی هه‌رێمی کوردستاندا ئاشکرای کردوووه: "نه مه‌رجمان هه‌یه بۆ به‌شداری له حکوومه‌ت و نه مه‌رجیش له که‌س قبووڵ ده‌که‌ین."
شایانی باسه؛ له چه‌ند ڕۆژی ڕابردوودا شاندێکی پارتی به مه‌به‌ستی گفتوگۆکردن ده‌رباره‌ی پێکهێنانی حکوومه‌تی داهاتووی هه‌رێمی کوردستان سه‌ردانی سلێمانی کرد و له‌گه‌ڵ هه‌ر یه‌ک له یه‌کێتی و گۆڕان کۆ بوووه‌وه.
سه‌رچاوه: میدیاکانی هه‌رێمی کوردستان
کۆدی هه‌واڵنێر: 60103
Your Comment