نازم دەباغ نوێنەری هەرێمی کوردستان لە تاران لە گفتوگۆ لەگەڵ کوردپرێسدا ئاماژەی دا بە سەردانەکەی ئەمڕۆی بەرهەم ساڵح سەرۆک کۆماری عێراق بۆ ئێران و وتی: "سەردانەکەی جەنابی بەرهەم ساڵح بۆ ئێران لە درێژەی سەفەرەکانی ئەم دواییەیدا بۆ وڵاتانی کەنداو بووە و بە ئاوڕدانەوەی لە پێوەندیی کۆنی ئێمە لەگەڵ کۆماری ئیسلامیی ئێران ئەو سەردانەی کردووە".
ناوبراو زیادی کرد ئێران یەک لە وڵاتە گرینگەکانی ناوچەکەیە و کۆماری ئیسلامی دۆستی نزیکی ئێمەیە.
نازم دەباغ وتیشی: سەردانی سەرۆک کۆمار لە دۆخێکدا کە گەمارۆ خراوەتە سەر ئێران پیشاندەری ئەوەیە کە ئێران بۆ عێراق و هەرێمی کوردستان گرنگارەتییێکی تایبەتی هەیە.
نوێنەری هەرێمی کوردستانی عێراق لە تاران ئاماژەی دا بە هەڵویستەکانی عێراق هەمبەر گەمارۆکانی ئەمریکا دژ بە ئێران و ڕایگەیاند: "هەروەها کە جەنابی بەرهەم ساڵح ئاماژەی پێدا عێراق و هەرێمی کوردستان سیاسەتێکی سەربەخۆ لەبارەی گەمارۆکان دەگرنەبەر و عێراق نایەوێت داخڵی هەوڵێکی نەشیاوانە ببێتەوە".
کۆدی هەواڵنێر: 60113
Your Comment