به‌پێی هه‌واڵی کوردپرێس، ڕوانگه‌ی سووری بۆ مافه‌کانی مرۆڤ له‌ ڕاپۆرتێکیدا که‌ ڕۆژی دووشه‌ممه 12ی تشرینی دووهه‌می 2018 بڵاوی کردۆته‌وه‌ ده‌ڵێت که‌ ته‌رمی 9 که‌سی دیکه‌ که‌ 5یان منداڵ و 3یان ژن بوون له‌ ئه‌ندامانی خێزانی چه‌کدارانی داعش، له‌ ژێر داروپه‌ردووی بۆردومانی ڕۆژی پێنجشه‌ممه‌ و ھه‌ینیی ڕابردووی ھێزه‌کانی ھاوپه‌یمانان بۆ سه‌ر شارۆچکه‌ی ھه‌جین ده‌رھێنراون.

ھه‌روه‌ھا ده‌ڵێت: به‌ھۆی بۆردومانی سه‌ختی ئه‌و دوو ڕۆژه‌ی سه‌ر ئه‌و ناوچه‌یه‌ تیمه‌کانیان گیان له‌ده‌ستدانی 50 ھاوڵاتیی مه‌ده‌نییان تۆمار کردوووه‌ که‌ 22یان منداڵ و 16یان ئافره‌ت بوون، 19 له‌وان (11 منداڵ و 7 ئافره‌ت) خه‌ڵکی سووریان و ئه‌وانی خه‌ڵکی عێراق بوون. نزیک به‌ 30 که‌سی دیکه‌ش بێسه‌روشوێن ماونه‌ته‌وه‌.

ڕێکخراوه‌که‌ ئه‌وه‌شی ڕاگه‌یاندوووه‌: به‌م ژماره‌یه‌، ژماره‌ی قوربانییه‌ مه‌ده‌نییه‌کانی شه‌ڕی ھه‌جین (دوایین پێگه‌ی داعش له‌ ڕۆژھه‌ڵاتی سووریا) لانی که‌م گه‌شتۆته‌ 132 که‌س، 43 له‌وان منداڵ و 28یان ئافره‌ت بوون.

ھێزه‌کانی سووریای دیموکرات به‌ ھاوکاریی ھێزه‌کانی ھاوپه‌یمانان له 10ی ئه‌یلوولی 2018وه‌ ھێرشی خۆیان بۆ سه‌ر ناوچه‌ی ھه‌جین له‌ سه‌ر سنووری عێراق و دوایین پێگه‌ی چه‌کدارانی داعش له‌ سووریا ده‌ست پێکردوووه‌، داعش له‌و ناوچه‌یه‌ به‌رگرییێکی سه‌خت ده‌که‌ن و ھێزه‌ ھاوپه‌یمانه‌کان نه‌یانتوانیوه‌ پێشڕه‌وییه‌کی ئه‌وتۆ بکه‌ن.

سه‌رچاوه‌: خه‌ڵک

کۆدی هه‌واڵنێر: 60103