به‌پێی هه‌واڵی کوردپرێس، سه‌فین دزه‌یی ڕای‌گه‌یاند که له پرسی سزاکانی ئه‌مریکا بۆ سه‌ر ئێران، هه‌ولێر پابه‌ندی بڕیاری به‌غدا ده‌بێت.
هاوکات باڵيۆزی پێشووی عێراقیش له واشنتۆن ئاماژه‌ی به‌وه کرد: ئه‌سته‌مه عادل عه‌بدولمه‌هدی بتوانێت هاوسه‌نگیی نێوان تاران و واشنتۆن ڕابگرێت. واقیعی جوگرافیاییی عێراق ئه‌وه ده‌خوازێت که له‌گه‌ڵ ئێران نزیکایه‌تی زۆری هه‌بێت به‌ڵام واقیعی سیاسیی ئه‌وه ده‌خوازێ که له‌گه‌ڵ ئه‌مریکا په‌یوه‌ندیی به‌هێزی هه‌بێت و ئێستا عێراق له به‌رده‌م هاوکێشه‌یێکی قورسدایه و پێویسته عێراق ته‌نها بیر له به‌رژه‌وه‌ندیی خۆی بکاته‌وه.
شاره‌زایان پێیان وایه ئه‌وه‌ی ئه‌مریکا ده‌یکات سۆنامییێکی به‌هێزه و پێویسته سه‌رۆکی ئه‌نجومه‌نی وه‌زیرانی عێراق ژوورێکی عه‌مه‌لیات پێکبهێنێ که ڕاسته‌وخۆ له په‌یوه‌ندیدا بن له‌گه‌ڵ تاران و واشنتۆن و ئێستاکه عادل عه‌بدولمه‌هدی له به‌رده‌م ئه‌رکێکی ئه‌سته‌مدایه چوونکه به ته‌نها ناتوانێ هاوسه‌نگی بپارێزێت به‌ڵکوو پێویستی به هه‌موو ده‌وڵه‌تی عێراقه.
سزا ئه‌مریکییه‌کان بواره‌کانی وزه، که‌رتی بانکی، که‌رتی که‌شتی سازی و گواستنه‌وه‌ی ده‌ریاییی ئێران ده‌که‌نه ئامانج و ئه‌مریکاش هه‌ندێک وڵات له نێویاندا عێراق به شێوه‌یێکی کاتی له هه‌ندێک له‌و سزایانه ده‌به‌خشێت، به‌خشینێک که دیار نییه تا که‌ی به‌رده‌وام ده‌بێ و له قۆناغی داهاتوودا پلانی عێراق چی ده‌بێت.
هه‌ر سه‌باره‌ت به سه‌پاندنى سزاكانى سه‌ر ئێران، ڕۆژی یه‌کشه‌ممه 4ی تشرینی یه‌که‌می 2018 له سلێمانی شاره‌زایانی ئابووری و یه‌كێتى هاورده و هه‌نارده‌كاران و ژوورى بازرگانى له پانێڵێكدا باسى سوود و زیانه‌كانى سه‌پاندنی قۆناغی دووه‌می گه‌مارۆ ئابوورییه‌كه‌‌ى سه‌ر ئێرانيان كرد و شاره‌زايان بڕوایان وایه سه‌پاندنى سزاكان ده‌رفه‌تێكه بۆ به‌گه‌ڕخستنه‌وه‌ی به‌شێک له‌و كارگانه‌ی هه‌رێمی كوردستان په‌كيان كه‌وتوووه بۆ ئه‌وه‌ی كاریگه‌رییێكی ئه‌وتۆی له‌سه‌ر ئابووری هه‌رێمی كوردستان نه‌بێت.
سه‌رچاوه: K24
کۆدی هه‌واڵنێر: 60103
Your Comment