بەپێی هەواڵی کوردپرێس، سه‌رحه‌د ڤارتۆ وته‌بێژی كۆما جڤاكێن كوردستان ڕاگه‌یاند: "ئه‌گه‌ر توركیا به‌رده‌وام بێت له هێرش كردنه سه‌ر خاكی هه‌رێم، ئێمه‌ش وه‌ک گه‌ریلا له هه‌رێم و سنووره‌كانی خاكی توركیا، چالاكی دژی سه‌ربازانی توركیا ده‌ست پێده‌كه‌ینه‌وه".
ناوبراو وتیشی: "په‌كه‌كه هاوشێوه‌ی ساڵانی ڕابردوو گورزی سه‌ربازیی توند له سه‌ربازانی ده‌وڵه‌تی توركیا ده‌دات به‌تایبه‌ت له ناوچه سنووریه‌كانی توركیا و هه‌رێمی كوردستان، به دڵنیاییه‌وه بۆ زستانی ئه‌مساڵیش چالاكیه‌كانمان دژی سه‌ربازانی توركیا به‌رده‌وام ده‌بێت و به چڕیش ده‌ست پێده‌كاته‌وه".
وته‌بێژی كه‌جه‌كه ئاماژه‌ی به‌وه‌ش كرد: "توركیا له په‌لاماره‌كانی بۆ سه‌ر خاكی هه‌رێم، هاوڵاتیانی سڤیل ده‌كاته ئامانج، به‌ڵام ئامانجی ئێمه دورخستنه‌وه‌ی ئه‌و مه‌ترسیانه‌یه له‌و ناوچانه‌ی كه شوێنی نیشته‌جێبونی هاوڵاتیانی مه‌ده‌نیه".
سه‌رحه‌د ڤارتۆ ئه‌وه‌شی وت: "توركیا له‌سه‌ر سنووری وڵاته‌كه‌ی و هه‌رێمی كوردستان ژماره‌ی سه‌ربازه‌كانیان زیاد كردووه و ئێمه‌ش وه‌ک په‌كه‌كه چالاكیه‌كانمان دژی توركیا به‌رده‌وام و زیاد ده‌كه‌ین و ڕێگه ناده‌ین زیان به كورد له ناوچه‌كه بگه‌یێنرێت و دژی داگیركارییه‌كانی توركیا له خاكی هه‌رێمی كوردستان ده‌وه‌ستینه‌وه".
ڤارتۆ زیاتر وتی:"داگیركاری له هه‌ر شوێنێک دژی كورد هه‌بێت، پێویسته ڕێگریی لێبكرێت، ئێمه‌ش ڕێگه ناده‌ین توركیا ئامانجه‌كانی خۆی دژ به‌كورد زامن بكات".
سەرچاوە: تۆڕی هەواڵی سلێمانی
کۆدی هەواڵنێر: 60113
Your Comment