بەپێی هەواڵی کوردپرێس، نیوه‌ڕۆی ئه‌مڕۆ چوارشه‌ممه 24-10-2018 نێچیرڤان بارزانى، سەرۆک وەزیرانی هەرێمی کوردستان پێشوازیى له فاتیح یڵدز، باڵیۆزی توركیا له عێراق كرد. باڵیۆزی تورکیا خۆشحاڵیی خۆی لە یه‌كه‌م سه‌ردانی بۆ هه‌رێمی كوردستان ده‌ربڕی و پیرۆزباییى سه‌ركه‌وتنی هه‌ڵبژاردنی په‌رله‌مانی كوردستانى له سه‌رۆک وه‌زیرانی هەرێمی کوردستان كرد.
بەپێی راگەیێندراوی حکوومەتی هەرێمی کوردستان لە دیدارەکەدا باڵیۆزی تورکیا لە عێراق به‌شداریی به‌هێزی هه‌رێمی كوردستانی له پرۆسه‌ی سیاسیی عێراق و كابینه‌ی نوێی حكوومه‌تی عێراق، هەروەها چاره‌سه‌ركردنی كێشه‌كانی هه‌ولێر ـ به‌غداى له چوارچێوه‌ی ده‌ستووردا بەپێویست زانی.
نێچیرڤان بارزانى، سەرۆک وەزیرانی هەرێمی کوردستان لە دیدارەکەدا رایگه‌یاند: "هێزه سیاسییه‌كانی كوردستان به هێزه‌وه له به‌غدا ده‌بن و به‌شداریی له حكوومه‌تی عێراقدا ده‌كه‌ن".
سه‌باره‌ت به هه‌رێمی كوردستانیش سەرۆک وەزیران تیشكی خسته‌سه‌ر سه‌ركه‌وتنی هه‌ڵبژاردنی په‌رله‌مانی کوردستان و ئاشكرای كرد كه له سه‌روبه‌ندی ئه‌وه‌دان كابینه‌ی نوێی حكوومه‌تی هه‌رێمی كوردستان پێک بهێنرێت.
کۆدی هەواڵنێر: 60113
Your Comment