به‌پێی هه‌واڵی کوردپرێس، ڕۆژی سێشه‌ممه 23ی تشرینی یه‌که‌می 2018 هێرۆ ئیبراهیم ئه‌حمه‌د له ڕێگای ڕاگه‌یێنراوه‌که‌یه‌وه ده‌ڵێت: "داوا له سه‌رجه‌م لایه‌نه سیاسییه‌كان ده‌كه‌م به ڕۆحێكی كوردانه‌وه هه‌وڵی جدی بده‌ن بۆ دروست كردنی یه‌كڕیزی و ته‌بایی و دوور بكه‌ونه‌وه له بیری ته‌سک و كورتبینی حیزبایه‌تی و گرتنه‌به‌ری هه‌ر ڕێگه‌یێک كه زیان به‌و ته‌بایییه ده‌گه‌یه‌نێت چوونكه میلله‌ته‌كه‌مان ساڵانێكی دژوار و ناهه‌مواری گوزه‌راندوووه و شایه‌نی كه‌شوهه‌وایێكی ئارام و خزمه‌تی ئێجگار زیاتره."
ده‌قی ڕاگه‌یێنراوه‌که:
به بۆنه‌ی ڕاگه‌یاندنی ئه‌نجامی فه‌رمیی هه‌ڵبژاردنی په‌رله‌مانی كوردستان و سه‌ركه‌وتنی پرۆسه‌كه‌وه سوپاس و پێزانینی خۆم بۆ خه‌ڵكی كوردستان به‌گشتی و ئه‌ندامان و لایه‌نگر و هه‌واداره وه‌فادار و خۆڕاگر و پشوودرێژه‌كانی یه‌كێتیی نیشتیمانیی كوردستان به‌تایبه‌تی ده‌كه‌م بۆ به‌شداری كردنتان له ده‌نگدان و سه‌رخستنی وێستگه‌یێكی دیكه‌ی خه‌باتی دیموكراسی و مه‌ده‌نیمان.
متمانه‌ی خه‌ڵكی كوردستان به یه‌كێتییه‌كه‌ی مام، ئاماژه‌یێكی ڕوونی ڕه‌وایی خه‌باتی یه‌كێتی و قه‌درزانینه بۆ مێژوووه پڕ سه‌روه‌رییه‌كه‌ی. هه‌روه‌ها دووپاتكردنه‌وه‌ی بڕوای ته‌واوه‌تیی خه‌ڵكه به یه‌كێتییه‌كه‌یان، به‌وه‌ی له ئاستی چاوه‌ڕوانیدایه و ده‌توانێت داوا و مافه ڕه‌واكانیان به‌دی بهێنێت.
سه‌ركه‌وتنی ئه‌مجاره‌مان، درێژكراوه‌ی مێژووی زێڕین و هه‌رگیز له‌بیرنه‌كراوی مامه كه له تاریكترین چركه‌ساتی مێژوودا، بوووه مه‌شخه‌ڵهه‌ڵگری گه‌له‌كه‌مان و بۆ یه‌كه‌مجار توانیی قه‌واره‌ی هه‌رێمی كوردستان دروست بكات. پێویسته یه‌كێتییش له ئاست گه‌وره‌ییی ئه‌و مێژووه‌دا بێت و كه‌م و زۆریش سازش له بچووكترین مافی خه‌ڵک نه‌كات. چوونكه یه‌كێتی خۆی هه‌ر له‌و پێناوه‌دا دامه‌زراوه و ڕه‌نجی داوه و ڕووبارێک خوێنی به‌خشیوه.
لێره‌وه پیرۆزبایی له دڵه‌وه هه‌ڵقوڵاوی خۆم ئاڕاسته‌ی پێشمه‌رگه و كه‌سوكاری سه‌ربه‌رزی شه‌هیدان و ئه‌نفالكراوان و ته‌واوی لایه‌نگران و ئه‌ندامانی یه‌كێتی و كاندیده سه‌ركه‌وتوووه‌كانی یه‌كێتی و سه‌رۆكی لیسته‌كه‌مان ده‌كه‌م به‌تایبه‌ت و بێگومانیشم سه‌باره‌ت به‌و به‌رپرسیارێتییه مێژوویییه، سه‌ركه‌وتوو ده‌بێت.
داواش له سه‌رجه‌م لایه‌نه سیاسییه‌كان ده‌كه‌م به ڕۆحێكی كوردانه‌وه هه‌وڵی جدی بده‌ن بۆ دروست كردنی یه‌كڕیزی و ته‌بایی و دوور بكه‌ونه‌وه له بیری ته‌سک و كورتبینی حیزبایه‌تی و گرتنه‌به‌ری هه‌ر ڕێگه‌یێک كه زیان به‌و ته‌بایییه ده‌گه‌یه‌نێت. چوونكه میلله‌ته‌كه‌مان ساڵانێكی دژوار و ناهه‌مواری گوزه‌راندووه و شایه‌نی كه‌شوهه‌وایێكی ئارام و خزمه‌تی ئێجگار زیاتره.
هێرۆ ئیبراهیم ئه‌حمه‌د
به‌یروت
2018-10-23
کۆدی هه‌واڵنێر: 60103
Your Comment