کوردپرێس:

ئیسماعیل مەهدەوی سەرۆکی ئیدارەی ستاندەری ئیلام لەو بارەیەوە ئاشکرای کرد: لە شەش مانگی یەکەمی ئەمساڵی هەتاویدا بڕی 81 هەزار تەن کاڵای ستاندەر لە سنووری مێهرانەوە بەرەو عێراق هەناردە کراوە کە نرخەکەی دەگاتە نزیکەی 40 ملوێن دۆلار.

مەهدەوی زیادی کرد زۆرینەی کاڵا هەناردەکراوەکان بریتی بوون لە کەرەستەی بیناسازی وەکوو کاشی و مزاییک کە زیاتر لە سەدا 55ی کاڵاکانی لە خۆ گرتبوو و کۆی نرخی کاڵای هەناردەکراو 39 ملوێن و 747 هەزار و 663 دۆلار بوو.

ناوبراو زیادیشی کرد لە کۆی کاڵا هەناردەکراوەکان تەنها چیمەنتۆکەی بەرهەمی پارێزگای ئیلامە و دیکەی کاڵاکان لە پارێزگاکانی دیکەی ئێرانەوە هێنراونەتە ئیلام و بەرەو عێراق هەناردە کراون.

سنووری مێهران دەکەوێتە بەری ڕۆژئاوای ئێران و ڕووبەرێکی بەرچاوی سنووری هاوبەشی نێوان ئێران و عێراق لە پارێزگای واسیتەوە دەگرێتەوە.