به‌پێی هه‌واڵی کوردپرێس، ئێواره‌ى شه‌ممه‌ 22-9-2018 نێچيرڤان بارزانى سه‌رۆكوه‌زيرانى هه‌رێمى كوردستان له‌ به‌غدا په‌يوه‌ندييێكى ته‌له‌فۆنى له‌ مايک پۆمپيۆ وه‌زيرى ده‌ره‌وه‌ى ئه‌مريكاوه‌ پێگه‌يشت.

به‌پێی ڕاگه‌یێندراوی حکوومه‌تی هه‌رێمی کوردستان، له‌ په‌يوه‌ندييه‌ ته‌له‌فۆنييه‌كه‌دا نێچيرڤان بارزانى و مایک پۆمپيۆ دوايين پێشهاته‌كانى دۆخى سياسى و ئاينده‌ى پرۆسه‌ى سياسيى عێراقيان تاوتوێ كردوووه‌ و تيشكيان خستوووه‌ته‌سه‌ر هه‌ڵبژاردنى ده‌سته‌ى سه‌رۆكايه‌تيى ئه‌نجومه‌نى نوێنه‌رانى عێراق و هه‌وڵه‌كان بۆ هه‌ڵبژاردنى سه‌رۆكايه‌تيى كۆمار و كابينه‌ى نوێى حكوومه‌تى داهاتووى عێراق.

له‌و پێوه‌ندییه‌ ته‌له‌فۆنییه‌دا هه‌ردوولا جه‌ختيان له‌ چڕكردنه‌وه‌ى هه‌وڵه‌كان بۆ سه‌رخستن و به‌ره‌وپێشبردنى پرۆسه‌ى سياسى له‌ عێراق كرده‌وه‌ و هيوايان خواست كه‌ قۆناخى داهاتووى عێراق قۆناخى سه‌قامگيريى سياسى و ئه‌منى بێت و حكوومه‌ت و ده‌سه‌ڵاتى داهاتووى عێراق ڕه‌نگدانه‌وه‌ى خواست و مافه‌كانى هه‌موو پێكهاته‌ عێراقييه‌كان بێت.

پۆمپيۆ هه‌روه‌ها ئاماژه‌ى به‌ گرنگيى ڕۆڵى كارا و به‌رچاوى هه‌رێمى كوردستان له‌ به‌شداريى پرۆسه‌ى سياسيى عێراق و پێكهێنانى هه‌ر سێ سه‌رۆكايه‌تييه‌كانى ئه‌و وڵاته‌دا كرد.

تاوتوێ كردنى په‌يوه‌ندييه‌كانى ئه‌مريكا له‌گه‌ڵ عێراق و هه‌رێمى كوردستان و دوايين پێشهات و په‌ره‌سه‌ندنه‌كانى عێراق و ناوچه‌كه‌ به‌گشتى به‌شێكى ديكه‌ى په‌يوه‌ندييه‌كه‌ى مايک پۆمپيۆ وه‌زيرى ده‌ره‌وه‌ى ئه‌مريكا بوو له‌گه‌ڵ نێچيرڤان بارزانى سه‌رۆكوه‌زيرانى هه‌رێمى كوردستان.‌

سه‌رچاوه‌: میدیاکانی هه‌رێمی کوردستان

کۆدی هه‌واڵنێر: 60103