به‌پێی هه‌واڵی کوردپرێس، ڕۆژی دووشه‌ممه‌ 10ی 9ی 2018 له‌ سه‌لاحه‌دین به‌ سه‌رپه‌رشتیی مه‌سعوود بارزانی و كۆسره‌ت ڕه‌سووڵ عه‌لی هه‌ر دوو مه‌كته‌بی سیاسیی یه‌كێتیی نیشتیمانیی كوردستان و پارتی دیموكراتی كوردستان كۆ بوونه‌وه‌ و چه‌ند بابه‌تێكی گرینگیان تاوتوێ كرد و بڕیاری پێویستیان له‌باره‌وه‌ وه‌رگیرا.

ده‌قی ڕاگه‌یێنراوه‌كه‌:

یه‌كه‌م: له‌ ڕوانگه‌ی به‌رژه‌وه‌ندیی گه‌له‌كه‌مان و هه‌ستیاریی بارودۆخه‌كه هه‌ردوولا جه‌خت له‌سه‌ر یه‌كهه‌ڵوێستی و پێكه‌وه‌ كاركردن له‌ به‌غدا و كوردستان ده‌كه‌نه‌وه‌ و بۆ ئه‌م مه‌به‌سته‌یش لیژنه‌ی هاوبه‌ش به‌رده‌وام له‌ په‌یوه‌ندیدا بن و ئاماده‌كاریی پێویست ئه‌نجام بده‌ن.

دووه‌م: هه‌روه‌كوو له‌ ماوه‌ی ڕابردوویش به‌ ئاشكرا رامانگه‌یاندوووه‌ بۆ یه‌كڕیزیی نێوماڵی كوردستان و به‌شداریی هه‌موو لایه‌نه‌كانی به‌شدار له ‌پڕۆسه‌ی سیاسیدا بانگهێشتی كۆبوونه‌وه‌یێكی هاوبه‌شی هه‌موو لایه‌نه‌كان ده‌كه‌ین و بۆ ئه‌م مه‌به‌سته‌ لیژنه‌یێک ڕاسپێردرا بۆ ئاماده‌كردنی پێداویستییه‌كانی ئه‌و كۆبوونه‌وه‌یه‌.

سێیه‌م: له‌به‌ر هه‌ستیاریی بارودۆخی كه‌ركووک و پێویستیی چاره‌سه‌ر كردنی بڕیاردرا ئه‌و لیژنه‌یه‌ی كه‌ له‌ كۆبوونه‌وه‌ی پێشوو پێكهێندرابوو ده‌ست به‌كار بن بۆ دیراسه‌كردن و هه‌نگاونان.

هه‌ر دوو مه‌كته‌بی سیاسیی

یه‌كێتیی نیشتیمانیی كوردستان

پارتی دیموكراتی كوردستان

10ی 9ی 2018

سه‌رچاوه‌: ماڵپه‌ڕی فه‌رمیی پارتی دیموکراتی کوردستان

‌کۆدی هه‌واڵنێر: 60103