به‌پێی هه‌واڵی کوردپرێس، عه‌بدولناسر هیمه‌تی له لێدوانێکی ڕۆژنامه‌وانیدا باسی له‌وه كرد له داهاتوویێكى نزیكدا له‌گه‌ڵ به‌ڕێوه‌به‌رانی بانکی ناوه‌ندیی رووسیا و تورکیا کۆ ده‌بنه‌وه و به شێوه‌یێکی خێرا ده‌ست ده‌که‌ن به جێبه‌جێ کردنی ئه‌و پرسانه‌ی که له ڕێککه‌وتنه‌که‌دا په‌سند کراوه.
ناوبراو ئه‌وه‌شى خسته‌ڕوو: لووتکه‌ی سێقۆڵیی ئێران- ڕووسیا- تورکیا له شاری تاران کۆبوونه‌وه‌یێکی گرنگی به ئاماده‌بوونی سه‌رکۆمارانی هه‌ر سێ وڵات ئه‌نجام دا و دانووستانیان له‌سه‌ر هه‌ندێک بابه‌ت وه‌ک بانک و ئاڵوگۆڕی کاڵا پێویستییه‌کان و نه‌وت و گاز کردوووه.
هیمه‌تی گوتیشی: ھه‌ر سێ وڵات ھاوڕا بوون له‌سه‌ر ئه‌وه‌ی که دراوی دۆلار له بازرگانی به‌کار نه‌ھێنن و به دراوی خۆیان بازرگانی بکه‌ن.
شایانی باسه؛ ڕۆژى هه‌ینی 7ی ئه‌یلوول لووتکه‌ی سێ قۆڵیی تورکیا- ڕووسیا- ئێران که تایبه‌ت بوو به تاوتوێ کردنی دۆخی سووریا به به‌شداریی سه‌رۆكى هه‌ر سێ وڵاته‌كه له تاران به‌ڕێوه چوو.
سه‌رچاوه: میدیاکانی ئێران
کۆدی هه‌واڵنێر: 60103
Your Comment