کوردپرێس- به‌ر له كۆبوونه‌وه‌ی ئه‌نجومه‌نی ئاسایشی نێوده‌وڵه‌تی، 8 وڵاتی ئه‌ندام له یه‌كێتیی ئه‌ورووپا نیگه‌رانییه‌كانی خۆیان له‌باره‌ی ڕه‌وشی ئیدلبه‌وه ده‌ربڕی و ڕایان‌گه‌یاند كه پشتگیری هه‌وڵه به‌په‌له دیپلۆماتییه‌كانی توركیا و نه‌ته‌وه یه‌كگرتوووه‌كان ده‌كه‌ن بۆ چاره‌سه‌ركردنی كێشه‌كان.
ئۆڵۆف سكوگ نوێنه‌ری هه‌میشه‌ییی سوید له نه‌ته‌وه یه‌كگرتوووه‌كان به‌ر له ده‌ست پێكردنی كۆبوونه‌وه‌ی ئه‌نجومه‌نی ئاسایشی نێوده‌وڵه‌تی به ناوی 8 وڵاتی ئه‌ندام له یه‌كێتیی ئه‌ورووپا ڕای‌گه‌یاند: ملیۆنان كه‌س به‌هۆی پێكدادانه‌كانی سووریاوه گه‌مارۆ دراون و كۆچیان كردوووه و ئازاری زۆریان چێشتوووه و داوای له لایه‌نه‌كان كرد به ڕێگای دیپلۆماتی كێشه‌كانیان چاره‌سه‌ر بكه‌ن.
سكوگ به ئاماژه‌دان به‌وه‌ی كه ئه‌نجامدانی ئۆپه‌راسیۆنێكی سه‌ربازی بۆ سه‌ر ئیدلب مه‌ترسیی زیاتر ده‌خاته سه‌ر ناوچه‌كه وتی: "به قوڵی نیگه‌رانی ئۆپه‌راسیۆنه سه‌ربازییه‌كانین كه له‌لایه‌ن ده‌وڵه‌تی سووریا و ڕووسیا ته‌شه‌نه‌یان پێ ده‌درێت له باكووری ڕۆژئاوای سووریا كه له‌وانه‌یه كاره‌ساتی مرۆیی لێبكه‌وێته‌وه".
ناوبراو ئاماژه‌ی به‌وه‌ش كرد: "ئه‌نجامدانی هێرشێكی سه‌ربازی ته‌واو بۆ سه‌ر ئیدلب ژیانی زیاتر له سێ ملیۆن كه‌س له ناوچه‌كه ده‌خاته مه‌ترسی كه یه‌ک ملیۆنیان منداڵن. گه‌مارۆدانی بێبه‌زه‌یییانه‌ی ده‌وڵه‌تی سووریا و ئۆپه‌راسیۆنه سه‌ربازییه‌كان له‌وانه‌یه ببێته هۆی شه‌پۆلێكی نوێی كۆچی به‌كۆمه‌ڵ كه ته‌نانه‌ت ئه‌و سڤیلانه‌ش بگرێته‌وه كه ئاواره و ده‌ربه‌ده‌ر بوون".
سكوگ جه‌ختی له‌وه‌ش كرده‌وه كه به‌كارهێنانی هه‌ر جۆره چه‌كێكی كیمیایی له سووریا قبوڵكراو نییه.
سه‌رچاوه: خه‌ندان
کۆدی هه‌واڵنێر: 60103
Your Comment