کوردپرێس:
میران محه‌مه‌د، په‌رله‌مانتاری یه‌كێتی له‌ئه‌نجومه‌نی نوێنه‌رانی عیراق لەو بارەیەوە ڕایگەیاند: وه‌ك فراكسیۆنه‌كانی یه‌كێتی و پارتی، ته‌نها له‌سه‌ر ئه‌وه ڕێككه‌وتووین كه بۆ هه‌ر شتێك په‌یوه‌ندیی به‌مافی كورده‌وه هه‌بێت، پێكه‌وه بڕیار ده‌ده‌ین، به‌ڵام بۆ پڕكردنه‌وه‌ی پۆسته‌كانی پشكی كورد، تائێستا حزبه كوردییه‌كان له‌ناوخۆی هه‌رێم یه‌كلانه‌بوونه‌ته‌وه و بڕیاری كۆتایییان له‌سه‌ر شێوازی وه‌رگرتنی پۆسته‌كان نه‌داوه.
ناوبراو وتیشی:" له‌گه‌ڵ پارتی گفتوگۆمان له‌سه‌ر هیچ پۆستێك نه‌كردووه و چاوه‌ڕوانی په‌یامی سه‌ركردایه‌تیی حزبه‌كانمان ده‌كه‌ین".
میران محه‌مه‌د، ڕه‌تیشی كرده‌وه هیچ بڕیارێك بۆ دروستكردنی هاوپه‌یمانێتی و بوونی یه‌ك سه‌رۆك فراكسیۆن له‌نێوان فراكسیۆنه‌كانی یه‌كێتی و پارتی هه‌بێت و ئاشكرای كرد: له‌گه‌ڵ وه‌فدی هاوبه‌شی یه‌كێتی و پارتی كه سه‌ردانی به‌غدایان كرد، كۆبووینه‌وه و پێیان ڕاگه‌یاندین، دانوستانیان له‌گه‌ڵ لایه‌نه شیعه و سوننه‌كان كردووه، به‌ڵام ڕێككه‌وتن له‌سه‌ر هیچ بابه‌تێك له‌ئارادا نییه، تا له‌و رووه‌وه په‌یاممان پێ بده‌ن.
میران محەمەد وتیشی: هه‌ر دۆخێكیش بێته پێشه‌وه له وه‌فده هاوبه‌شه‌كه‌وه ئاگادار ده‌كرێینه‌وه و په‌یاممان پێده‌درێت".
Your Comment