به‌پێی هه‌واڵی کوردپرێس، مه‌لا به‌ختیار كارگێڕی مه‌كته‌بی سیاسیی یه‌كێتی نیشتمانی كه له‌گه‌ڵ شاندێكی پارتی دیموكرات به سه‌رۆكایه‌تیی فازڵ میرانی له شاری به‌غدان ده‌ڵێت: هه‌ر دوو حیزب پرۆژه‌یێكی هاوبه‌شیان هه‌یه بۆ به‌شداری له حكومه‌تی داهاتووی عێراق كه تێدا مه‌رج و داواكارییه‌كانی هه‌رێمی خراوه‌ته ڕوو و پارتی و یه‌كێتی له‌گه‌ڵ ئه‌و لایه‌نانه ڕێكده‌كه‌ون كه ده‌توانن پڕۆژه هاوبه‌شه‌كه‌ی پارتی و یه‌كێتی جێبه‌جێ بكه‌ن.
لێپرسراوی ده‌سته‌ی كارگێڕی مه‌كته‌بی سیاسی یه‌كێتیی نیشتمانیی كوردستان و سه‌رۆكی شاندی باڵای یه‌كێتی بۆ به‌غدا گوتیشی: "ئه‌مڕۆ یه‌کشه‌ممه 2ی ئه‌یلوول كۆبوونه‌وه‌كان له‌گه‌ڵ سه‌رجه‌م لایه‌نه سیاسییه‌كانی عێراق ده‌ست پێده‌كه‌ن که له‌سه‌ر پێکهێنانی حکوومه‌ت ده‌بێت و سبه‌ی یه‌كه‌م دانیشتنی په‌رله‌مانی كوردستانه و ھیوادارین له یه‌كه‌م كۆبوونه‌وه‌یدا په‌رله‌مان به‌شێک له ئامانجه‌كان بپێكێ و چاوه‌ڕوان ده‌كه‌ین له ڕۆژانی ئاینده‌دا له‌سه‌ر بنه‌مای ته‌وافوق و به‌پێی ده‌ستوور بگه‌ینه ئه‌نجامێكی دڵخۆشكه‌ر."
ناوبراو ئاماژه‌ی به‌وه‌ش دا: "پڕۆژه‌ی پارتی و یه‌كێتی دۆزی میلله‌تێكه، ھه‌موو لایه‌نه‌كان ئاگاداری پڕۆژه‌كه‌ی ئێمه‌ن و له‌گه‌ڵ ئه‌و لایه‌نانه ڕێكده‌كه‌وین كه به‌شی زۆری داواكانمان جێبه‌جێ ده‌كه‌ن، ئه‌وه لای ئێمه گرنگه "ئه‌زموونه‌كانی ڕابردوو له حوكمڕانی و خۆدزینه‌وه له ده‌ستوور و جێبه‌جێ نه‌كردنی مادده‌ی 140 و كێشه‌ی نه‌وت و غاز و پڕچه‌ک نه‌كردنی پێشمه‌رگه له حكوومه‌ته‌كانی عێراقه."
مه‌لا به‌ختیار ئه‌وه‌شی خسته ڕوو: "ھیوادارین ئه‌مجاره حكوومه‌ت به شێوه‌یێک پێكبھێندرێت كه ھیچ لایه‌نێک نه‌توانێ خۆی له جێبه‌جێ كردنی ڕێككه‌وتنه‌كان و بڕگه‌كانی ده‌ستوور بدزێته‌وه."
قسه‌كانی كارگێڕه‌كه‌ی مه‌كته‌بی سیاسیی یه‌كێتی دوای كۆبوونه‌وه‌یان هات له‌گه‌ڵ فوئاد مه‌عسووم سه‌رۆک كۆماری عێراق كه له‌و كۆبوونه‌وه‌یه باسی پێكهێنانی حكوومه‌تی داهاتووی عێراقیان كردوووه.
سه‌رچاوه: شارپرێس
کۆدی هه‌واڵنێر: 60103
Your Comment