بەپێی هەواڵی کوردپرێس، ئەمڕۆ شەممە 23ـی تشرینی یەکەم، مەسعوود مەسعوود بارزانی سەرۆکی پارتی دیموکراتی کوردستان پێشوازیی لە یۆناس لۆڤێن باڵوێزی نوێی سوید لە عێراق کرد.
لە دیدارەکەدا باڵوێزی سوید لە عێراق ستایشی ڕۆڵی هێزی پێشمەرگەی هەرێمی کوردستانی کرد لە شەڕی دژی تیرۆر، پێزانینیشی بۆ هەرێمی کوردستان هەبوو بۆ یارمەتیدانی ئاوارە و پەنابەران و لێقەوماوان.
باڵوێزی سوید ئاماژەشی بە ڕۆڵی دیاسپۆرای کوردی لە فراوان کردنی پێوەندییەکانی هەردوولادا و هیواشی خواست کە پێوەندیی نێوان وڵاتەکەی و هەرێمی کوردستان لە بواری ئابووری پەرە بستێنێ.
باسی لەوەش کراوە، بارزانی سوپاسی سویدی کرد کە هەمیشە لەگەڵ ئێش و ئازاری گەلی کوردستان هاوسۆز بووە، لە ڕۆژانی تەنگانەدا یارمەتی هاووڵاتییانی کوردستانی داوە.
مەسعوود بارزانی وێڕای ئەوەی پێشوازیی لە پەرەپێدانی پێوەندییەکانی هەردوولا کرد، هیوای سەرکەوتنیشی بۆ باڵوێزی تازەی سوید لە عێراق خواست لە ئەرک و کارەکانیدا.
هەڕەشەی تیرۆر لەسەر سەقامگیریی جیهانی و ڕووبەڕووبوونەوەی تیرۆر و توندڕۆیی، تەوەرێکی تری ئەو دیدارە بوو.
Your Comment