کوردپرێس:

یاشار یاکیس یەکێکە لەو کەسانەی لە دامەزراندنی پارتی دادوگەشە بە سەرکردایەتیی ئەردۆغان دەوری بینیوە و ئێستا بڕوای وایە کە دەبێت تورکیا بە سیاسەتی خۆیدا بچێتەوە و ستراتێژییەتی بەرانبەر بە کوردی سووریا بگۆڕێت.

ناوبراو وتارێکی لە ڕۆژنامەی عەرەب نیوزدا نووسیوە وتێیدا وتوویەتی ئەمریکا یارمەتیی خۆی بۆ ناردنی 230 ملوێن دۆلار بۆ کوردی سووریا گۆڕی و پێویستە تورکیاش ستراتێژییەتی خۆی بەرانبەر بە کورد بگۆڕێت.

یاکیس دەشڵێت تورکیا و سووریا بەرژەوەندیی هاوبەشیان هەیە بەتایبەت کە دیمەشق و ئەنقەرە هەردووک دژ بە دامەزراندنی ناوچەی خۆبەڕێوەبەری کوردن لە باکووری سووریا.

وەزیری پێشووی دەرەوەی تورکیا زیادی کردووە کە کورد پێشتر سوودی زۆری لە یارمەتیی سەربازی و داراییی ئەمریکا بردووە بەڵام ئەگەر بزانێت خەیانەتی لێدەکرێت ئەوا ڕوو دەکاتە گفتوگۆ کردن لەگەڵ دیمەشق و پێش دوو حەفتەیش ئەو گفتوگۆیە دەستی پێکردووە.

بەو حاڵەشەوە بەبڕوای ناوبراو ڕێککەوتنی تورکیا و ئەمریکا لە بارەی منبەجەوە زیاتر ڕێککەوتنێکی سەمبۆڵییانەیە لەبەر ئەوەی هەر ئێستاش ئەمریکا دەتوانێت ئیدعای ئەوە بکات کە کوردی لە مەنبەج دوور کردۆتەوە و تورکیاش دەتوانێت ئیدعای ئەوە بکات کە کوردی لە مەنبەج کردۆتە دەرەوەی ڕووباری فورات.

یاکیس دەشڵێت ئەمریکا بە ملوێنان دۆلار سەرمایەی بۆ کوردی سووریا خەرج کردووە و لە قۆناغی پاش قەیرانی سووریا سوودی لێ وەردەگرێت و پێ دەچێت دەست لە کوردی سووریا بەر نادات.