بەپێی هەواڵی کوردپرێس، سەنتەری میترۆ لەو بارەیەوە راگەیێندراوێکی بڵاو کردەوە و رایگەیاند: "ئێوارەی ئەمڕۆ هێزێكی ئەمنی لە سلێمانی چوونە ناو بینای كەناڵی ئای پڵەسی سەر بە (لاهور شێخ جەنگی)، هاوسەرۆكی یەكێتییەوە".

سەنتەری میترۆ دەڵێت: "چەند كارمەندێكی دەزگای میدیایی ئای پڵەس، پەیوەندییان بە سەنتەری میترۆوە كرد: باسیان لەوە كرد هێزێكی چەكدار هەڵیانكوتاوەتە سەر بینای ئۆفیسی سەرەكی كەناڵەكەیان لە گەڕەكی كوردسات، شەقامی شەست مەتری، كارمەندەكانی ناو دەزگاكەیان لە سوچێكی بیناكە دەستبەسەر كردووە كەلوپەلەكانیان شكاندووە و هەندێكیان ئازار داوە".

سەنتەری میترۆ بە "تووندی" سەرکۆنەی هەڵكوتانە سەر كەناڵی تازە دامەزراوی iPLUS دەكات لەلایەن هێزێكی چەكدار لە شاری سلێمانی، داوا دەكات ململانێكانی یەكێتی شۆڕنەبنەوە بۆ "دەمكوتكردن و بەرتەسككردنەوەی ئازادیی رۆژنامەگەری".

کەناڵەکەی لاهوور شێخ جەنگی نووسینگەی سەرەکیی لە سلێمانییە و دەکەوێتە سەر شەقامی 60 مەتری، کەناڵەکە تاوەکو ئێستا دەستی بە پەخش نەکردووە.

کۆدی هەواڵنێر: 60113