به‌پێی هه‌واڵی کوردپرێس، ئێواره‌ی ڕۆژی یه‌كشه‌ممه 5ی ئابی 2018 نێچیرڤان بارزانی سه‌رۆک وه‌زیرانی هه‌رێمی كوردستان پێشوازی له ڤلیم كۆزه‌ین كونسووڵی گشتیی نوێی شانشینی هۆڵه‌ندا له هه‌رێمی كوردستان و شاندێكی یاوه‌ری كرد.
له دیدارێكدا كۆزه‌ین خۆشحاڵیی خۆی به دیداری نێچیرڤان بارزانی ده‌ربڕی و ئاماده‌ییى خۆی بۆ په‌ره‌پێدانی زیاتری په‌یوه‌ندییه‌كانی نێوان هه‌رێمی كوردستان و هۆڵه‌ندا له هه‌موو بواره‌كاندا نیشان دا.
لای خۆیه‌وه نێچیرڤان بارزانی پیرۆزبایی ده‌ستبه‌كاربوونی له كونسووڵی نوێی هۆڵه‌ندا كرد و هیوای سه‌ركه‌وتنی له ئه‌ركی نوێیدا بۆ خواست و پشتگیریی خۆی و داموده‌زگاكانی حكوومه‌تی هه‌رێمی بۆ كار و چالاكییه‌كانی نیشان دا و جه‌ختیشى له پته‌وكردنی زیاتری په‌یوه‌ندییه‌كان له هه‌موو بواره‌كان به‌تایبه‌تی له كه‌رتی كشتوكاڵدا كرده‌وه.
سه‌رۆک وه‌زیرانی هه‌رێمی کوردستان سوپاسی حكوومه‌تی هۆڵه‌ندای كرد بۆ هاوكارییه مرۆیی و سه‌ربازییه‌كانیان بۆ هه‌رێمی كوردستان به‌تایبه‌تی به‌شداری كردنیان له پرۆگرامی چاكسازی له وه‌زاره‌تی كاروباری پێشمه‌رگه‌دا و هیوای به‌رده‌وامیی هاوكارییه‌كانی خواست.
تاوتوێ كردنی دۆخی ناوچه‌كه به‌گشتی و هه‌ڵسه‌نگاندنی به‌رزى ئه‌نجامی دوا سه‌ردانی سه‌رۆک وه‌زیرانی هه‌رێمی كوردستان بۆ هۆڵه‌ندا لایه‌نێكی دیكه‌ی دیداره‌كه بوو.
سه‌رچاوه: ماڵپه‌ڕی فه‌رمیی پارتی دیموکراتی کوردستان
کۆدی هه‌واڵنێر: 60103
Your Comment