کوردپرێس:

دەستەی بەڕێوەبردنی کارەسات و باری لەناکاو AFAD سەر بە وەزارەتی ناوخۆی تورکیا بڵاوی کردەوە؛ ژمارەی ئەو کەسانەی لە بومەلەرزەکەی ئیزمیردا گیانیان لەدەستداوە بەرزبووەتەوە بۆ 102 کەس.

ئافاد بڵاوی کردەوە؛ لە سەعات هەشتی بەیانی و لەدوای ئەو بومەلەرزەیەی لە رۆژی هەینی رابردو 30ی تشرینی یەکەمدا بە گوڕی 6.6 پلە رویدا، 1475 پاشلەرزە رویانداوە کە 44یان گوڕەکەیان لەسەرو چوار پلە بوە.

بەپێى ئەو زانيارييەى لە ناوەندى هەماهەنگيى کارەساتە تەندروستییەکان SAKOMەوە وەرگيراوە لە بومەلەرزەكەدا، 102 کەس گيانيانلەدەستداوە و 1026 كەس برينداربون، لەوانەش 883 يان لە دواى وەرگرتنى چارەسەر نەخۆشخانەیان جێهێشتوە و 143 کەسی دیکە لەژێر چارەسەردان.

ئاژانسی ئەنادۆڵ بڵاوی کردەوە؛ لە كۆى 17 باڵەخانە كارەكانى گەڕان و رزگاركردن لە 12 باڵەخانەدا تەواوبوە و كارکردن لە پێنج باڵەخانەدا درێژەی هەیە، مەترسی روخان لەسەر ئەو باڵەخانانەش هەیە کە زیانیان بەرکەوتووە.