کوردپرێس:
مەسعوود بارزانی سەرۆکی پارتی دیموکراتی کوردستان ڕۆژی چوارشەممە 21ـی تشرینی یەكەمی 2020 لە سەلاحەدین پێشوازیی لە ناگایاما یوشیكۆ كونسوڵی ژاپۆن لە هەولێر كرد.
لە كۆبوونەوەكەدا مەسعوود بارزانی پیرۆزباییی كردنەوەی نووسینگەی كونسوڵخانەی ژاپۆن لە شاری هەولێر كرد و، هیوای سەركەوتنی بۆ كونسوڵی ژاپۆن خواست لە ئەرك و كارەكانیدا.
هەر لەو دانیشتنەدا كونسوڵی ژاپۆن وێڕای دەربڕینی ڕێزی خۆی بۆ گەلی كوردستان، جەختی لە ویستی وڵاتەكەی كردەوە بۆ پەرەپێدانی پەیوەندییەكان لەگەڵ هەرێمی كوردستان و حكوومەتی فیدڕاڵی عێراق، هەروەها بەشداری لە پڕۆسەی گەشەسەندن و ئاوەدانكردنەوە.
كونسوڵی ژاپۆن خۆشحاڵیی خۆشی راگەیاند بەو سەقامگیرییەی لە هەرێمی كوردستاندا هەیە و پیرۆزباییی رێككەوتنی شنگالی نێوان حكوومەتی هەرێم و حكوومەتی فیدراڵی كرد.
تاوتوێكردنی لێكەوتەكانی پەتای كۆرۆنا تەوەرێكی تری ئەو دیدارە بوو.
Your Comment