کوردپرێس:

سەعید خەتیب زادە وتەبێژی وەزارەتی دەرەوەی ئێران لە لێدوانێکدا ئاماژەی بە شەڕی ناوچەی قەرەباغ کرد کە لە نێوان دوو وڵاتی ئەرمێنیا و ئازەربایجان ڕووی داوە و ڕایگەیاند ئێران هیچ جۆرە سنووربەزاندنێکی لایەنەکان قبووڵ ناکات و لەبارەی ئەگەری پەلکێش کردنی شەڕ بۆ نێو خاکی ئێران هۆشداری بە هەر دوو لایەنی شەڕەکە دراوە.

خەتیب زادە جەختی کردەوە: ئێران ڕێز لە سەروەریی خاکی ئازەربایجان دەگرێت و داوای لە هەر دوو لایەنەکە کردووە کۆتایی بە ناکۆکی و شەڕ بهێنن و گفتوگۆی جدی بکەن و ئێرانیش ئامادەیە بۆ گفتوگۆکان یارمەتیی هەر دوو لایەن بدات.

شایانی باسە ماوەیێکە شەڕ و پێکدادان لە نێوان دوو وڵاتی ئەرمێنیا و ئازەربایجان لە ناوچەی قەرەباغ ڕووی داوە و گرژییەکان پەرەیان سەندووە و وڵاتی باس لەوە دەکرێت کە وڵاتی تورکیا میلیشیا توندڕەوەکانی سوپای ئازادی سووریای بۆ شەڕ ناردۆتە ناوچەکە و پەرلەمانتارێکی کوردی ئێزدیی ئەرمێنیاش وتبووی ژمارەیێک شەڕڤانی کوردی ئێزدی بۆ یارمەتیدانی ئەرمێنیا ڕەوانەی ناوچەکە کراون.