کوردپرێس:
كیفاح شه‌نگالی، به‌رپرسی نووسینگه‌ی ڕاگه‌یاندنی مه‌سعوود بارزانی، سه‌رۆكی پارتی دیموكراتی كوردستان به‌كه‌ناڵی "ئه‌لحورره"ی ڕایگه‌یاند، ئامانج له هێرشه مووشه‌كییه‌كه‌ی شه‌وی ڕابردوو بۆ لێدانه له مسته‌فا كازمی و ڕێگریی له نزیك بوونه‌وه‌ی له هه‌رێم، نه‌ك ئامانج له‌لێدانی هێزه‌كانی ئه‌مریكا.
به‌وته‌ی به‌رپرسی نووسینگه‌ی ڕاگه‌یاندنی مه‌سعوود بارزانی، "ئه‌و كه‌سانه‌ی ئه‌و كاره‌یان كردووه له‌به‌رژه‌وه‌ندیی وڵاتێكی ناوچه‌كه بووه كاره‌كه‌یان، نزیك بوونه‌وه‌ی كازمی له هه‌رێم و وڵاتانی دیكه‌ی عه‌ره‌بی ئه‌وانی بێزار كردووه، بۆیه ده‌یانه‌وێت له‌ڕێگه‌ی ئه‌و كارانه‌وه ئه‌و نزیكبوونه‌وه‌یه به‌ئامانج بگرن".
كیفاح شه‌نگالی هێرشه مووشه‌كیه‌كه‌ی شه‌وی ڕابردووی هه‌ولێر به هه‌وڵێك بۆ تێكدانی "ئارامترین شاری عێراق" ناوده‌بات.
شایانی باسە شەوی چوارشەمە لە سەر پێنجشەمە 30ی ئەیلوولی 2020 دەزگای دژە تیرۆری هەرێمى کوردستان رایگەیاند، شه‌ش مووشه‌ک لەلایەن حەشدی شەعبییەوە لە پارێزگای مووسڵەوە ئاڕاستەی فڕۆکەخانەی هه‌ولێر كراون و هيچ زيانێكى لێنه‌كه‌وتووەتەوە.
پاش کەوتنەخوارەوەی 6 مووشەک لە نزیک فڕۆکەخانەی هەولێر، وەزارەتی ناوخۆی هەرێمی کوردستان له راگه‌یه‌ندراوێكدا سەرکۆنەی هێرشەکەی کرد و ڕایگەیاند: "بە توندترین شێوە ئەم هێرشە تێرۆریستییە ترسنۆکانەیە ئیدانە دەکەین، لە هەمان کاتدا ئامادەییی تەواومان هەیە بۆ بەرپەچدانەوەی هەر دەستدرێژییێک. داواش لە حکوومەتی فیدرالی دەکەین دەست بە جێ ئیجرائاتی پێویست وەربگرن".
لای خۆیەوە سەرۆکی حکوومەتی هەرێمی کوردستان لە تویتێکدا ئیدانەی هێرشەکەی کرد و نووسیی: "حکوومەتی هەرێم لێبوردە نابێت بەرامبەر هەر هەوڵێک بۆ تێکدانی سەقامگیریی کوردستان و وەڵامی توندی دەبێت."
لە ڕاگەیێندراوێکیشدا حەشدی شەعبی لەبارەی کەوتنەخوارەوەی مووشەکەکان ڕایگەیاند ئەو خاڵەی مووشەکەکانی لێوە هاوێژراوە خاڵێکی بۆشی نێوان هێزەکانی حەشد و هێزەکانی پێشمەرگەیە و بەدواداچوون بۆ دۆزینەوەی شوێنی بەڕێکەوتنی ئەو ئوتومبێلە بارهەڵگرەی مووشەکەکانی لێوە هاوێژراوە بەردەوامە و هەر کەس یان لایەنێک دەستی تێدا بووبێت ڕادەستی یاسا دەکرێت.
Your Comment