کوردپرێس:

گۆڤاری مدیۆم لە ڕاپۆرتێکدا لەبارەی دۆخی ئابووریی کوردستانی سووریاوە باسی ئەوە دەکات کە لە ناوچەی ژێردەسەڵاتی کوردەکانی سووریا پێوەری ڕێکخستنی کۆمپانیا هەرەوەزییەکان بۆتە سەرەکیترین و گرینگترین پێوەری ئابووری.

ئەو گۆڤارە دەشنووسێت کە کوردستانی سووریا ناوچەیێکی بەستراوە دەستی بە دەرەوەی خۆی ناگات چوونکە بە پێی نووسراوی ئەو گۆڤارە سنوورەکانی تورکیا داخراون و کوردەکانی سووریا ئاڵوگۆڕ وپێوەندیی ئابووریی کەمیان لەگەڵ هەرێمی کوردستانی عێراق هەیە.

مدیۆم ئەوەشی نووسیوە کە کوردەکانی سووریا هەوڵیان داوە لە ڕێگای دامەزراندنی کۆمپانیا هەرەوەزییەکانەوە ئابووری خۆیان سەربەخۆ بەڕێوە بەرن و بە گوێرەی ئیمکانیات و ئەو توانایەی لە بەردەستیاندایە پێداویستیی سەرەکیی خۆیان بەرهەم بهێنن.

گۆڤاری مدیۆم ئاماژەی بەوەش کردووە کە ئێستا ژمارەیێک لە کۆمپانیا هەرەوەزییەکان دەستیان کردووە بە بەرهەمهێنانی دەمامک بۆ پاراستین هاووڵاتییان لە ڤایرۆسی کۆرۆنا.

هەر لە ڕاپۆرتەکەی ئەو گۆڤارەدا باسی ئەوەش کراوە کە چەندین کۆمپانیای وەرزێری و بەرهەمهێنانی خواردەمەنی بە هاوکاری و بەشداریی فراوانی هاووڵاتییانی کوردی سووریا لە ناوچەی ئیدارەی خۆسەر دامەزراون و کاری بەرهەمهێنانی پێداویستییەکانی خۆیان دەکەن.