بەپێی هەواڵی کوردپرێس، دوێنێ سێ گەنج کە تەمەنیان کەمتر لە بیست ساڵ بوو داخڵی بینای پارێزگاریی هەولێر بوونەوە و وێڕای بە بارمتە گرتنی فەرمانبەرانی پارێزگاریی هەولێر دەستیان کردە تەقە کردن. هێزە ئەمنییەکان پاش چوار کاتژمێر پێکدادان و گەمارۆدانی بیناکە ئەو سێ هێرشبەرەیان کوشت.

ناوەندە ئەمنییەکان دەڵێن ئەو کەسانە سەربە داعشن و دەوترێت لە کۆبوونەوەکانی مامۆستایێکی ئاینیی توندڕەو و نزیک لە داعش بەشدارییان کردووە کە بە گوێرەی میدیاکانی هەرێم ئەمڕۆ سێشەممە دەستگیر کراوە.

بەرپرسێکی ئەمنیی کورد بە ڕۆیتێرزی وتووە چۆنیەتیی دزە کردنی ئەو سێ کەسە بۆ ناو بینای پارێزگاریی هەولێر هاوشێوەی تاکتیکەکانی داعش بووە.

ڕۆژنامەی واشنتن تایمز لە ڕاپۆرتێکیدا لەبارەی ڕووداوەکەی هەولێر سەبارەت بە گەڕانەوەی ئەوەی کە «داعشی ژمارە 2» ناوی لێدەبات هۆشدار دەدات. ڕۆژنامەکە دەڵێت بارپرسانی ئەمریکی و عێراقی لەبارەی ڕاگەیاندنی کۆتایی هاتنی داعش پەلەیان کردووە.

ئەو ڕۆژنامەیە بە ئاوڕدانەوە لە هێرشە هاوشێوەکانی شانەی نووستووی داعش لە مەخموور، کەرکووک و ناوچەکانی دەورووبەر هۆشداری داوە ئەگەر هەوڵێکی جیدی و چڕ لەو بارەیەوە نەدرێت مومکینە گرووپێکی توندئاژۆی دیکە کە دەتوانین ناوی داعشی 2ی لەسەر دانین جارێکی دیکە لە عێراق و هەرێمی کوردستان سەرهەڵبدات.

کۆدی هەواڵنێر: 60113